سیکرٹری ہاؤسنگ کا F-14، F-15 کا دورہ، تجاوزات کے خاتمے اور ترقیاتی کاموں میں تیزی کا حکم

اسلام آباد (صدائے سچ نیوز)سیکرٹری ہاؤسنگ اینڈ ورکس کیپٹن ریٹائرڈ محمد محمود نے ڈی جی ایف جی ای ایچ اے کیپٹن ریٹائرڈ ظفر اقبال اور این ایل سی حکام کے ہمراہ سیکٹر F-14 اور F-15 کا تفصیلی دورہ کیا اور ترقیاتی کاموں کو تیز کرنے کی ہدایات جاری کیں۔

دورے کے دوران اراضی کے زیرِ التواء معاملات اور تجاوزات کے فوری خاتمے کے لیے الگ ٹیمیں تشکیل دینے کا فیصلہ کیا گیا، جبکہ منصوبے کو جدید اور ماحول دوست بنانے کے لیے سولر پاور پلانٹ، رین واٹر ہارویسٹنگ، اور سائیکل ٹریکس شامل کرنے کی سفارش کی گئی۔

سیکرٹری ہاؤسنگ نے آئیسکو کے تعاون سے بجلی، پانی اور سڑکوں کا کام ترجیحی بنیادوں پر مکمل کرنے کا حکم دیتے ہوئے پندرہ روزہ کارکردگی رپورٹ طلب کر لی ہے۔

مزید برآں، اراضی پر پہلے سے موجود تمام مساجد اور امام بارگاہوں کی فہرستیں دوبارہ چیک کرنے اور ان کی قانونی حیثیت کی مکمل تصدیق کرنے کا فیصلہ کیا گیا ہے، جس کے بعد یہاں بین الاقوامی معیار کے مطابق مساجد کے نئے ڈیزائن اور ماسٹر پلان پر کام شروع کیا جائے گا تاکہ سرکاری ملازمین کو ہر قسم کی قانونی رکاوٹوں سے پاک ایک مثالی اور پائیدار رہائشی منصوبہ فراہم کیا جا سکے۔