ایف جی ای ہاوسنگ اتھارٹی کا بروقت اقساط نہ جمع کرانے پر پلاٹ کینسل کرنے کا فیصلہ

اسلام آباد (صدائے سچ نیوز) فیڈرل گورنمنٹ ایمپلائز ہاوسنگ اتھارٹی نے بروقت اقساط جمع نہ کرانے پر پلاٹوں کی الاٹمنٹ کینسل کرنے کا فیصلہ کیا ہے ۔

جاری پریس ریلیز کے مطابق سیکٹر F-14/15 چند ایسے الاٹیز جو سال 2016 سے مسلسل اپنی واجب الادا اقساط جمع کروانے میں ناکام رہے اور متعدد مواقع فراہم کیے جانے کے باوجود انہوں نے ایک روپیہ بھی جمع نہیں کروایا۔ اس صورتحال کا تفصیلی جائزہ لینے کے لیے ہاؤسنگ اتھارٹی کے ایگزیکٹو بورڈ کی ہدایات پر ایک خصوصی کمیٹی تشکیل دی گئی جس نے تمام ریکارڈ، قواعد و ضوابط اور قانونی تقاضوں کا بغور جائزہ لیا۔

کمیٹی کی سفارشات اور تمام قانونی و انتظامی مراحل مکمل ہونے کے بعد فیصلہ کیا گیا کہ چھے (6) پلاٹس، جن کے مالکان نے سال 2016 سے مالی ذمہ داریوں کی ادائیگی نہیں کی، ان کی الاٹمنٹ منسوخ کی جائے۔ یہ فیصلہ مکمل شفافیت، میرٹ اور مروجہ قوانین کے مطابق کیا گیا ہے تاکہ منصوبے کی ترقی میں حائل رکاوٹوں کو دور کیا جا سکے اور ذمہ دار الاٹیز کے حقوق کا تحفظ یقینی بنایا جا سکے۔مزید سیکٹر F-14 اور F-15 کے معزز الاٹیز کو مطلع کیا جاتا ہے کہ وہ اپنی اقساط بروقت جمع کروائیں ۔

جاری پریس ریلیز میں یہ بتایا گیا کہ ایسے تمام الاٹیز اور پلاٹس کی لسٹیں تیار کی جا رہی ہیں جو بروقت اقساط جمع نہیں کروارہے، ان کے پلاٹس بھی مروجہ قانون کینسل کیے جائیں گے ۔

وفاقی وزیر ہاؤسنگ اینڈ ورکس ریاض حسین پیرزادہ ، سیکرٹری ہاؤسنگ کیپٹن (ر) محمد محمود اور ڈائریکٹر جنرل FGEHA کیپٹن (ر) ظفر اقبال کی خصوصی ہدایات پر مذکورہ سیکٹرز میں ترقیاتی سرگرمیوں کو تیز کرنے، الاٹیز کے مسائل حل کرنے، بنیادی سہولیات کی فراہمی یقینی بنانے اور منصوبے کی جلد تکمیل کے لیے مسلسل اجلاسوں، فیلڈ وزٹس اور انتظامی اقدامات کا سلسلہ جاری ہے۔

یہ بھی پڑھیں: ایف جی ای ہاؤسنگ اتھارٹی نے اہم سنگِ میل عبور کرلیا، سیکٹر ایف 14, 15 کے متاثرین میں لینڈ شیئرنگ بنیاد کے تحت پروویژنل آفر لیٹرزکی تقسیم

اتھارٹی کی قیادت نے اس عزم کا اعادہ کیا ہے کہ سیکٹر F-14 اور F-15 کو جدید شہری تقاضوں کے مطابق ایک ماحول دوست (Environment-Friendly)/Climate Resilient، پائیدار اور مثالی رہائشی منصوبہ بنایا جائے گا، جہاں شہریوں کو بہترین رہائشی سہولیات فراہم کی جائیں گی۔ منصوبے کی بروقت تکمیل اور الاٹیز کو جلد از جلد پلاٹس کی فراہمی اتھارٹی کی اولین ترجیحات میں شامل ہے۔

فیڈرل گورنمنٹ ایمپلائز ہاؤسنگ اتھارٹی نےاس موقع پر ان تمام الاٹیز کا تہہ دل سے شکریہ ادا کیا جنہوں نے اپنی واجب الادا اقساط بروقت جمع کروائیں اور منصوبے کی ترقی میں بھرپور تعاون کیا۔ ان ذمہ دار الاٹیز کے تعاون سے ترقیاتی کاموں کی رفتار کو برقرار رکھنے میں نمایاں مدد ملی ہے۔