بارہویں جماعت میں نمایاں پوزیشن حاصل کرنے والے طلبہ و طالبات کے اعزاز میں تقریب

اسلام آباد (صداۓ سچ نیوز) وفاقی نظامتِ تعلیم (FDE) کے زیرِ اہتمام فیڈرل بورڈ آف انٹرمیڈیٹ اینڈ سیکنڈری ایجوکیشن (FBISE) کے مئی 2026ء میں منعقدہ HSSC-II امتحانات میں نمایاں کامیابی حاصل کرنے والے طلبہ و طالبات کے اعزاز میں سالانہ تقریبِ تقسیمِ اعزازات اسلام آباد ماڈل کالج برائے طالبات، اسٹریٹ 25، ایف-6/2 میں منعقد ہوئی۔

تقریب کی مہمانِ خصوصی پارلیمانی سیکرٹری برائے وفاقی تعلیم و پیشہ ورانہ تربیت رابعہ نسیم فاروقی تھیں۔ ڈائریکٹر جنرل وفاقی نظامتِ تعلیم جاوید اقبال مرزا، محکمہ تعلیم کے افسران، پوزیشن ہولڈر کالجوں کے سربراہان، والدین اور طلبہ و طالبات نے تقریب میں شرکت کی۔

تقریب کے دوران ہیومینیٹیز، پری میڈیکل، پری انجینئرنگ، سائنس جنرل/آئی سی ایس اور کامرس گروپس میں پہلی، دوسری اور تیسری پوزیشن حاصل کرنے والے طلبہ و طالبات میں نقد انعامات اور اعزازی شیلڈز تقسیم کی گئیں۔

ڈائریکٹر اکیڈمکس وفاقی نظامتِ تعلیم رفعت جبین نے امتحانی نتائج کا خلاصہ پیش کرتے ہوئے طلبہ کی تعلیمی کامیابیوں کو اساتذہ، والدین اور اداروں کی مشترکہ محنت کا نتیجہ قرار دیا۔ انہوں نے بتایا کہ 2025ء تا 2026ء کے دوران بین الکلیاتی مقابلوں میں فیڈرل ڈائریکٹوریٹ آف ایجوکیشن نے نمایاں کارکردگی کا مظاہرہ کیا اور ہم نصابی سرگرمیوں میں کامیابیوں کی بنیاد پر اسے تمام ڈائریکٹوریٹس میں بہترین ڈائریکٹوریٹ قرار دیا گیا۔

ڈائریکٹر جنرل جاوید اقبال مرزا نے نمایاں کارکردگی دکھانے والے طلبہ و طالبات کی محنت، عزم اور نظم و ضبط کو سراہتے ہوئے کہا کہ تعلیمی کامیابیوں میں اساتذہ کی رہنمائی، والدین کی معاونت اور اداروں کا مثبت تعلیمی ماحول بنیادی اہمیت رکھتا ہے۔ انہوں نے تعلیمی برتری کے ساتھ جسمانی نشوونما اور ہم نصابی سرگرمیوں میں حصہ لینے کی اہمیت پر بھی زور دیا۔

مہمانِ خصوصی رابعہ نسیم فاروقی نے کامیاب طلبہ و طالبات کو مبارک باد دی اور والدین، اساتذہ اور تعلیمی اداروں کی خدمات کو سراہا۔ انہوں نے طلبہ کو مستقبل میں بھی محنت جاری رکھنے، عاجزی اختیار کرنے، بڑوں کا احترام کرنے اور دوسروں کی مدد کرنے کی تلقین کی۔

تقریب میں پوزیشن ہولڈرز کے علاوہ متعلقہ کالجز کے پرنسپلز کو بھی تعلیمی کامیابیوں کے اعتراف میں اسناد پیش کی گئیں۔ اس موقع پر مہمانِ خصوصی کو ان کی کارکردگی کےاعتراف میں اعزاز بھی پیش کیا گیا۔ تقریب کا اختتام شرکاء کے گروپ فوٹو کے ساتھ ہوا۔