بیرسٹر گوہر کا عمران خان کے ایکس اکاؤنٹ سے لاتعلقی کا اظہار

اسلام آباد (صداۓ سچ نیوز) ہائیکورٹ نے بانی پی ٹی آئی عمران خان کا ایکس اکاؤنٹ بند کرنے سے متعلق کیس میں بیرسٹر گوہر کو تحریری جواب جمع کرانے کے لیے مہلت دے دی۔ عدالت نے سماعت 23 نومبر تک ملتوی کر دی۔

اسلام آباد ہائیکورٹ میں بانی پی ٹی آئی کے ایکس اکاؤنٹ بند کرنے سے متعلق کیس کی سماعت ہوئی۔ جسٹس ارباب محمد طاہر نے غلام مرتضیٰ کی درخواست پر سماعت کی۔

بیرسٹر گوہر ذاتی حیثیت میں عدالت پیش ہوئے جبکہ بانی پی ٹی آئی کے وکلا خالد یوسف چوہدری اور شمسہ کیانی سمیت این سی سی آئی اے حکام بھی عدالت میں موجود تھے۔

جسٹس ارباب محمد طاہر نے ریمارکس دیے کہ بیرسٹر گوہر کو ذاتی طور پر طلب نہیں کیا تھا، صرف تحریری جواب بھجوا دیتے۔ بیرسٹر گوہر  نے مؤقف اختیار کیا کہ پی ٹی آئی اس اکاؤنٹ کو کلیم نہیں کرتی۔ حالات تبدیل ہو چکے ہیں، جواب جمع کرانے کے لیے وقت دیا جائے۔ عدالت نے مہلت دیتے ہوئے کیس کی سماعت 23 نومبر تک ملتوی کر دی۔