چیئرمین او پی ایف سید قمر رضا نقوی کی نواز شریف اور مریم نواز کو اوورسیز پاکستانیوں کے مسائل پر بریفنگ

مظفرآباد (صدائے سچ نیوز) چیئرمین اوورسیز پاکستانیز فاؤنڈیشن (او پی ایف) سید قمر رضا نقوی نے مظفرآباد میں پاکستان مسلم لیگ (ن) کے قائد اور سابق وزیراعظم میاں محمد نواز شریف اور وزیراعلیٰ پنجاب مریم نواز شریف سے ملاقات کی۔

ملاقات کے دوران بیرونِ ملک مقیم پاکستانیوں کی فلاح و بہبود، انہیں درپیش مسائل کے حل اور آزاد کشمیر کی موجودہ صورتحال پر تفصیلی تبادلۂ خیال کیا گیا۔

چیئرمین او پی ایف سید قمر رضا نقوی نے اوورسیز پاکستانیز فاؤنڈیشن کی جانب سے سمندر پار پاکستانیوں کی شکایات کے بروقت ازالے اور انہیں بہتر سہولیات کی فراہمی کے لیے کیے جانے والے اقدامات سے آگاہ کیا۔ انہوں نے وزیراعلیٰ پنجاب مریم نواز شریف کی جانب سے اوورسیز پاکستانیوں کی سہولت کے لیے شروع کیے گئے اقدامات کو بھی سراہا۔

اس موقع پر چیئرمین او پی ایف نے آزاد کشمیر کی موجودہ صورتحال اور خطے میں معمولاتِ زندگی کی بحالی کے لیے جاری کوششوں پر بھی بریفنگ دی۔

میاں محمد نواز شریف نے اوورسیز پاکستانیز فاؤنڈیشن کی جانب سے سمندر پار پاکستانیوں کی فلاح و بہبود کے لیے کیے جانے والے اقدامات کو سراہتے ہوئے چیئرمین او پی ایف سید قمر رضا نقوی کے عزم، لگن اور خدمات کی تعریف کی۔ انہوں نے بیرونِ ملک مقیم پاکستانیوں کے مسائل کے حل کے لیے او پی ایف کے کردار کو اہم قرار دیا۔