عوام پر مزید ہتھوڑے چلائے جا رہے ہیں: حافظ نعیم الرحمٰن

کراچی (صدائے سچ نیوز) جماعتِ اسلامی پاکستان کے امیر حافظ نعیم الرحمٰن نے کہا ہے کہ حکومت فوری طور پر پیٹرولیم لیوی کا خاتمہ کرے اور قیمتوں میں اضافہ واپس لے۔

جاری کیے گئے بیان میں پیٹرولیم مصنوعات کی قیمتوں میں اضافے پر حافظ نعیم الرحمٰن نے کہا ہے کہ ‏لیوی اور ناجائز ٹیکس ختم کرنے کے بجائے پیٹرول اور ڈیزل کی قیمتوں میں اضافہ کیا گیا۔

حافظ نعیم الرحمٰن نے کہا ہے کہ یہ اضافہ متوسط اور غریب طبقے کو توڑ کر رکھ دے گا، پیٹرولیم مصنوعات کی قیمتوں میں اضافہ صنعتوں اور کاروبار کو برباد کر دے گا۔

انہوں نے کہا کہ انتہائی مہنگی بجلی اور گیس نے پہلے ہی ہر چیز کی قیمت میں آگ لگائی ہوئی ہے، عوام پر مزید ہتھوڑے چلائے جا رہے ہیں جو ناقابلِ قبول ہیں۔

یاد رہے کہ گزشتہ روز حکومت نے پیٹرولیم مصنوعات کی قیمتوں میں بڑا اضافہ کیا تھا جن کا اطلاق آج 25 اپریل 2026ء سے ہو گیا۔

وزارتِ توانائی (پیٹرولیم ڈویژن) کی جانب سے جاری کیے گئے پریس ریلیز کے مطابق ہائی اسپیڈ ڈیزل اور پیٹرول دونوں کی قیمتوں میں 26 روپے 77 پیسے فی لیٹر اضافہ کیا گیا ہے۔

اعلامیے کے مطابق ہائی اسپیڈ ڈیزل (HSD) کی قیمت 353 روپے 42 پیسے سے بڑھا کر 380 روپے 19 پیسے فی لیٹر جبکہ موٹر اسپرٹ (پیٹرول) کی قیمت 366 روپے 58 پیسے سے بڑھا کر 393 روپے 35 پیسے فی لیٹر کر دی گئی ہے۔

حکام کے مطابق نئی قیمتیں آئندہ ہفتے کے لیے نافذ العمل ہوں گی۔