انتظامی یونٹس کا معاملہ آئین کے مطابق حل کریں، حافظ نعیم الرحمان

ایران (صداۓ سچ نیوز) امیر جماعت اسلامی پاکستان حافظ نعیم الرحمان نے کہا ہے کہ انتظامی یونٹس کا معاملہ آئین کے مطابق حل کریں۔

ادارہ نور حق کراچی میں پریس کانفرنس میں حافظ نعیم الرحمان نے کہا کہ پنجاب اسمبلی نے صوبوں کے حوالے سے آئین کے مطابق قرارداد منظور کی ہوئی ہے۔

انہوں نے کہا کہ انتظامی یونٹس کے حوالے سے آئین جو کہتا ہے اس کے مطابق کریں، سندھی مہاجر تقسیم پیدا نہ کریں، پیپلز پارٹی اور ایم کیو ایم نورا کشتی نہ کریں۔

امیر جماعت اسلامی نے مزید کہا کہ لیوی کے نام پر عائد بھتہ ٹیکس کے خلاف 3 ستمبر کو ملک گیر ہڑتال ہوگی، جس کے بعد آئندہ کے لائحہ عمل کا اعلان کریں گے۔

اُن کا کہنا تھا کہ بھتہ لیوی ہر صورت ختم کرنا ہوگی جبکہ نئے انتظامی یونٹس کے معاملے پر بھی آئین اور عوام کی رائے کے مطابق فیصلہ کیا جائے۔

حافظ نعیم الرحمان نے یہ بھی کہا کہ لیوی کے نام پر بھتہ ٹیکس عوام پر معاشی بوجھ ہے، ایک طالب علم پیٹرول ڈلوائے تو اس سے بھی35 فیصد ٹیکس وصول کیا جاتا ہے۔

انہوں نے کہا کہ ارب پتی طبقے کا بوجھ عام پاکستانیوں اور طلبہ پر ڈالا جا رہا ہے، مختلف ٹیکسز کے ذریعے عوام سے رقم وصول کی جا رہی ہے جبکہ حکمران طبقے کی عیاشیوں پر اربوں روپے خرچ کیے جا رہے ہیں۔

امیر جماعت اسلامی نے کہا کہ ہماری تحریک گلی محلوں کی سطح تک پھیل رہی ہے، کارکن مارکیٹوں میں تاجروں سے رابطے کر رہے ہیں جبکہ تاجر برادری نے کل کی ہڑتال کی حمایت کی ہے۔