آٹے کی قیمتوں میں خود ساختہ اضافہ، ٹیکسلا کے شہری پریشان

ٹیکسلا (نمائندہ خصوصی سید ہادی عمران) ٹیکسلا شہر اور گرد و نواح میں آٹے کی قیمتوں میں خود ساختہ اضافہ دیکھنے میں آ رہا ہے۔ دکانداروں اور مختلف مارٹس نے آٹا سرکاری نرخوں پر فروخت کرنا بند کر دیا ہے، جبکہ جو آٹا دستیاب ہے وہ معیار کے لحاظ سے کھانے کے قابل نہیں۔

شہریوں کے مطابق انتظامیہ کی عدم توجہی کے باعث آٹا مافیا نے من مانی شروع کر رکھی ہے۔ دکاندار اپنی مرضی کے ریٹ وصول کر رہے ہیں، جس سے غریب اور متوسط طبقہ شدید متاثر ہو رہا ہے۔

ذرائع کے مطابق متعدد شکایات کے باوجود اسسٹنٹ کمشنر ٹیکسلا اور پرائس کنٹرول کمیٹی کی طرف سے اب تک کوئی واضح کارروائی عمل میں نہیں لائی گئی۔ شہریوں نے ضلعی انتظامیہ سے فوری نوٹس لینے اور منافع خوروں کے خلاف سخت کارروائی کا مطالبہ کیا ہے۔