وزیراعظم کا پاکستان کو 2050 تک بڑی عالمی معیشت بنانے کا ویژن قابلِ ستائش ہے، صدر لاہور چیمبر آف کامرس

لاہور (صداۓ سچ نیوز) لاہور چیمبر آف کامرس اینڈ انڈسٹری کے صدر علی حسام اصغر نے وزیراعظم شہباز شریف کے پاکستان کو 2050 تک دنیا کی بڑی معیشتوں میں شامل کرنے کے ویژن کا خیرمقدم کرتے ہوئے کہا ہے کہ معدنی وسائل کی مقامی پراسیسنگ اور مینوفیکچرنگ ملکی معیشت، سرمایہ کاری اور برآمدات کے فروغ میں اہم کردار ادا کرسکتی ہے۔

ہفتہ کو جاری بیان میں انہوں نے کہا کہ خام معدنیات برآمد کرنے کے بجائے ملک میں ریفائننگ اور ویلیو ایڈیشن کو فروغ دینا ضروری ہے، جس سے صنعتی ترقی، روزگار کے مواقع اور برآمدات میں اضافہ ہوگا۔

انہوں نے ریکوڈک جیسے منصوبوں کو معاون صنعتوں اور سرمایہ کاری کے فروغ کے لیے اہم قرار دیتے ہوئے کہا کہ پاکستان کو سرمایہ کاروں کا اعتماد بحال کرنے، پالیسیوں میں تسلسل، جدید ٹیکنالوجی اور صنعتی انفراسٹرکچر کی ترقی پر توجہ دینا ہوگی۔

علی حسام اصغر نے کہا کہ 2050 کے معاشی اہداف کے حصول کے لیے برآمدات پر مبنی ترقی، صنعتی توسیع، سرمایہ کاری اور معاشی تنوع کو قومی حکمت عملی کا حصہ بنانا ہوگا۔