اپوزیشن نے محمود اچکزئی اور راجہ ناصر عباس کو مذاکرات کا مکمل اختیار دیدیا

اسلام آباد (صداۓ سچ نیوز) اپوزیشن جماعتوں کی پارلیمانی پارٹی نے محمود خان اچکزئی اور علامہ ناصر عباس کو مذاکرات کا مکمل اختیار دے دیا۔

اسلام آباد میں اپوزیشن جماعتوں کی پارلیمانی پارٹی کا اجلاس اپوزیشن لیڈر قومی اسمبلی محمود خان اچکزئی کی زیر صدارت ہوا۔

ذرائع کے مطابق پی ٹی آئی کی پارلیمانی پارٹی نے پارلیمنٹ کے دونوں ایوانوں کے قائدین حزب اختلاف کو مذاکرات کا مکمل اختیار دینے کی قرارداد منظور کرلی۔

قرارداد میں کہا گیا ہے کہ محمود خان اچکزئی جو فیصلہ کریں گے وہ پارلیمانی پارٹی کو قبول ہوگا۔

 اجلاس کے بعد میڈیا سے گفتگو کرتے ہوئے محمود اچکزئی کا کہنا تھا اجلاس میں فیصلہ کیا گیا ہے کہ تحریک چلائیں گے ، پُرامن رہیں گے ، کسی کو گالی نہیں دیں گے، فیصلہ کیا ہے کہ آئین کا دفاع کرنا ہے۔

یہ بھی پڑھیں؛ وفاقی آئینی عدالت نے سرکاری ملازمین کی سینیارٹی سے متعلق اہم فیصلہ سنادیا

 چیئرمین پی ٹی آئی بیرسٹر گوہر علی نے کہا پارلیمانی پارٹی نے مشترکہ طور پر کہا ہے کہ مائنس بانی پی ٹی آئی منظور نہیں۔

 علامہ راجہ ناصر عباس نے کہا مذاکرات کا فیصلہ کرنے کو کم زوری نہ سمجھا جائے ، اگراس ملک کو چلانا ہے تو ضروری ہے کہ بات چیت ہو ، وزیراعظم اپوزیشن لیڈر کے چیمبر میں آجائیں ۔