ایران کو بجلی کے عوض 12 ملین ڈالر کی ادائیگی واجب الادا ہے، وزیر توانائی

اسلام آباد (صداۓ سچ نیوز) وفاقی وزیر توانائی اویس لغاری نے ایران سے بجلی کی درآمد سے متعلق قومی اسمبلی میں تحریری جواب جمع کروا دیا ہے جس میں کہا کہ ایران سے مکران ریجن کو 204 میگاواٹ بجلی مل رہی ہے اور بجلی کے عوض ایران کو 12 ملین ڈالر کی ادائیگی واجب الادا ہے ۔

تفصیلات کے مطابق اویس لغاری کا کہناتھا کہ ایران سے 4 سرحدی ٹرانسمیشن لائنوں کے ذریعے پاکستان بجلی ملتی ہے،ایران سے گوادر،تربت،پنجگور،تمپ،جیوانی،پسنی اور مکران کو بجلی دی جاتی ہے،ایران کو بجلی کے عوض 12 ملین ڈالر کی ادائیگی واجب الادا ہے، ایران سے درآمد کی جانے والی بجلی کے نرخ نیپرا سے منظور شدہ ہیں۔

وزیر توانائی کا کہناتھا کہ بجلی کی ادائیگی کی ذمہ داری سینٹرل پاور پرچیزنگ ایجنسی کی ہے،ایران سے بجلی حاصل کرنے والے علاقوں کے صارفین بل ادا کرنے کے پابند ہیں،ایرانی بجلی کے بلوں کی وصولی کوئٹہ الیکٹرک سپلائی کمپنی کرتی ہے،بلوچستان کے ان علاقوں میں نقصانات کی بنیاد پر لوڈشیڈنگ کی جاتی ہے،4انٹرکنکشن لائنوں کے ذریعے زیادہ سے زیادہ 204 میگاواٹ بجلی لی جاسکتی ہے،مکران ریجن کو قومی بجلی کے نظام سے منسلک کرنے کا کام مکمل کر لیا،طویل ٹرانسمیشن لائن اور وولٹیج کے مسائل دور کرنے کیلئے اقدامات زیرِ غور ہیں۔

وزیر توانائی نے آئی پی پیز اور بجلی کے گردشی قرضے سے متعلق تفصیلات قومی اسمبلی میں پیش کرتے ہوئے کہا کہ 2024-25 میں کمپنیوں کو 1669 ارب کیپسٹی پیمنٹس کی مد میں ادا کیے،2025-26 میں آئی پی پیز کو کیپسٹی پیمنٹس کی مد میں 1711 ارب روپے ادا کیے،2024-25 میں 127046 گیگا واٹ آور بجلی پیدا کی گئی، 2025-26 میں بجلی کی پیداوار بڑھ کر 128540 گیگا واٹ آور رہی۔

معاہدوں کے تحت بجلی گھروں کو کیپسٹی پیمنٹس ادا کی جاتی ہیں، پلانٹس کو ضرورت کے وقت بجلی پیدا کرنے کیلئے تیار رکھنے کی ادائیگی ہوتی ہے،غیرضروری آئی پی پیز کے معاہدے ختم کرکے صارفین کا مالی بوجھ کم کیا،30 جون 2026 تک سی پیک بجلی منصوبوں کے ذمے 400ارب روپے وواجب الادا تھے، روپے کی قدر میں کمی سے ڈالر سے منسلک قرضوں اور منافع کی لاگت بڑھتی ہے،قرضوں اور منافع کی لاگت بڑھنے سے بجلی کے نرخوں پر بھی دباؤ پڑتا ہے۔

انہوں  نے کہا کہ 30 جون 2026 تک بجلی کا گردشی قرضہ 1675 ارب روپے تک پہنچ گیا، گردشی قرض کی بڑی وجوہات میں زیادہ لائن لاسز، کم ریکوری اور مالی اخراجات ہیں،مہنگے آئی پی پیز کے معاہدے ختم اور ہائبرڈ ٹیک اینڈ پے ماڈل متعارف کرائے،بجلی معاہدوں میں تاخیر سے ادائیگی کے سود میں رعایت دی گئی، سود کی شرح اور روپے کی قدر میں کمی کے اثرات منجمد کئے گئے۔