پی ٹی آئی نے ڈی چوک میں دھرنے کا اعلان کردیا

پشاور (صداۓ سچ نیوز) پشاور پاکستان تحریکِ انصاف نے ڈی چوک میں دھرنے کا اعلان کردیا۔

صوبائی صدر جنید اکبر نے خیبر پختونخوا کے تمام پارلیمنٹیرینز کو ڈی چوک پہنچنے کی ہدایت کی ہے ،جنید اکبر نے کہا کہ پارلیمنٹیرینز ڈی چوک دھرنے میں شرکت ہر صورت یقینی بنائیں۔

دوسری جانب پی ٹی آئی کے مرکزی سیکرٹری اطلاعات شیخ وقاص اکرم کا کہنا ہے کہ جب تک بانی پی ٹی آئی سے متعلق مطالبات نہیں مانے جاتے دھرنا جاری رہے گا۔

جمعہ کی نماز کے بعد ملک گیر دھرنا ہوگا،سپریم کورٹ کا جو فیصلہ ہے وہ قبول ہے لیکن دکھ قوم کے سامنے ہے۔پی ٹی آئی کے ساتھ امتیازی سلوک ناقابل معافی ہے ،جب نواز شریف کی صحت خراب تھی آپ وہ باتیں یاد کریں جو آپ لوگ کیا کرتے تھے۔

بانی پی ٹی آئی جب وزیراعظم بنا تو صحت کارڈ کی شکل میں عوام کو ریلیف دیا،لیکن آج ان کا علاج نہیں کیا جارہا ہے، 3 ماہ انہوں نے صرف آئی ڈراپس پر گزارے۔

انہوں نے کبھی بھی کھانے اور جیل کے احاطے پر بات نہیں کی ،آپ کیسے بانی پی ٹی آئی کے ساتھ یہ ظلم کر سکتے ہیں؟

عوام میں غم وغصہ ہے جو وہ سڑکوں پر نکل کر نکالیں گے پھر آپ کو نظر آئے گا، بانی پی ٹی آئی کا فوری علاج الشفاء سے کرایا جائے،کس نے جیلر کو اتنا حق دیا کہ وہ عدالتوں کا حکم ٹھکرا دے۔

اگر بانی پی ٹی آئی کو کچھ ہوا تو ذمہ داری وفاقی حکومت پر ہوگی،جب بیماری بگڑ گئی تو تب ان کو ایسے ہسپتال لے کر گئے جہاں وہ ڈاکٹر ہی موجود نہیں تھا۔