وزیراعظم ہانگژو پروگرام کے بعد بیجنگ پہنچ گئے، چینی صدر سے ملاقات کرینگے

بیجنگ (صداۓ سچ نیوز) وزیراعظم شہباز شریف ہانگژو پروگرام مکمل کرنے کے بعد بیجنگ پہنچ گئے۔ 

اس حوالے سے جاری اعلامیہ کے مطابق چین کے وزیر برائے ماحولیات ہوانگ رون چیو نے وزیرِ اعظم کا استقبال کیا، وزیراعظم نے ہانگژو میں تیسرے پاک چین بی ٹو بی انویسٹمنٹ کانفرنس کی افتتاحی تقریب کی صدارت کی۔ 

تقریب چارجنگ انفرا اسٹرکچر، بیٹری انرجی اسٹوریج، سولر ٹیکنالوجیز اور فارما سیوٹیکل شعبوں پر خصوصی توجہ دی گئی۔ 

اعلامیہ کے مطابق وزیراعظم شہباز شریف بیجنگ میں چین کے صدر شی جن پنگ سے ملاقات کریں گے، وزیر اعظم چینی ہم منصب لی چیانگ سمیت اعلیٰ چینی حکام سے بھی ملاقاتیں کریں گے۔ 

اعلامیہ کے مطابق چینی قیادت سے ملاقاتوں میں پاک چین آل ویدر اسٹریٹجک کوآپریٹو پارٹنرشپ کو مزید مضبوط بنانے پر تبادلہ خیال ہوگا۔

یہ بھی پڑھیں: ترقی کے سفر میں پاکستان جلد چین کا ہمقدم ہوگا، وزیراعظم

اعلامیہ کے مطابق سی پیک فیز ٹو کے تحت تجارت، صنعت، زراعت، سائنس و ٹیکنالوجی اور عوامی روابط کے شعبوں میں تعاون کے فروغ پر بھی بات ہوگی۔

اعلامیہ کے مطابق وزیراعظم کا دورہ پاک چین سفارتی تعلقات کے قیام کی 75ویں سالگرہ کے موقع پر ہو رہا ہے۔