ایران کو جوہری ہتھیار حاصل نہ کرنے دینا اصل مقصد ہے، ڈونلڈ ٹرمپ

واشنگٹن (صداۓ سچ نیوز) امریکی صدر ڈونلڈ ٹرمپ نے کہا ہے کہ ایران اس وقت امریکہ کے ساتھ رابطے میں ہے اور ممکنہ معاہدے پر بات چیت کرنا چاہتا ہے، تاہم واشنگٹن کسی بھی صورت تہران کو جوہری ہتھیار حاصل کرنے کی اجازت نہیں دے گا۔

وائٹ ہاؤس، واشنگٹن ڈی سی میں سالانہ وائٹ ہاؤس کورسپونڈنٹس ڈنر سے خطاب کرتے ہوئے ٹرمپ نے کہا کہ ایرانی حکام مذاکرات کر رہے ہیں اور معاہدے میں دلچسپی رکھتے ہیں، لیکن ان کے بقول ابھی اس کے لیے مناسب وقت نہیں آیا۔ انہوں نے کہا کہ وہ ایران کا مؤقف سننے کے لیے تیار ہیں، تاہم امریکہ کا مؤقف واضح ہے کہ ایران کو جوہری ہتھیار رکھنے کی اجازت نہیں دی جا سکتی۔

ٹرمپ نے یہ بھی دعویٰ کیا کہ امریکی کارروائیوں کے نتیجے میں ایران کی عسکری صلاحیت کو نمایاں نقصان پہنچا ہے۔ ان کے مطابق ایرانی بحریہ تقریباً غیر مؤثر ہو چکی ہے جبکہ فضائیہ کو بھی بھاری نقصان اٹھانا پڑا ہے۔

انہوں نے دعویٰ کیا کہ تقریباً 250 طیارے ناکارہ بنائے گئے اور 159 بحری جہاز یا کشتیاں تباہ ہو کر سمندر برد ہو گئیں۔ ان کا کہنا تھا کہ ایران کے ریڈار نظام بھی شدید متاثر ہوئے ہیں اور اس کے ڈرون بیڑے کی صلاحیت بھی محدود ہو چکی ہے، اگرچہ ایران وقتاً فوقتاً اپنی طاقت کا مظاہرہ کرنے کی کوشش کر سکتا ہے۔

امریکی صدر نے ایک مرتبہ پھر اس بات پر زور دیا کہ امریکہ کی اولین ترجیح ایران کو جوہری ہتھیار حاصل کرنے سے روکنا ہے۔ ان کے بقول اگر ایران کو ایسی صلاحیت حاصل ہو گئی تو اس کے استعمال کا خطرہ موجود رہے گا۔