کیا امریکا ایران جنگ ختم ہونے والی ہے؟ تہران نے جوہری مذاکرات پر آمادگی ظاہر کردی

ایران نے اپنے جوہری پروگرام سے متعلق اہم معاملات پر بات چیت کیلئے رضامندی ظاہر کردی ہے، جسے امریکا کے ساتھ جاری جنگ ختم کرنے کی سفارتی کوششوں میں ممکنہ پیشرفت قرار دیا جا رہا ہے۔

بلومبرگ کی رپورٹ کے مطابق مذاکرات سے واقف ایک سفارت کار نے انکشاف کیا ہے کہ واشنگٹن اور تہران جنگ کے خاتمے کیلئے کسی ممکنہ معاہدے کے قریب پہنچ سکتے ہیں۔ ایران نے جوہری پروگرام سے متعلق ان امور پر بھی مذاکرات کیلئے آمادگی ظاہر کی ہے جو پہلے بات چیت کے ایجنڈے میں شامل نہیں تھے۔

سفارت کار نے حساس نوعیت کی معلومات کے باعث نام ظاہر نہ کرنے کی شرط پر بتایا کہ تہران اپنے جوہری پروگرام کے حوالے سے قطر کی جانب سے پیش کردہ تجاویز کا سنجیدگی سے جائزہ لے رہا ہے۔

رپورٹ کے مطابق جوہری معاملات پر ایران کی جانب سے کسی بھی قسم کی لچک مذاکرات میں اہم پیشرفت کا راستہ کھول سکتی ہے اور جنگ کے خاتمے کیلئے دونوں ممالک کے درمیان اتفاق رائے پیدا کرنے میں مددگار ثابت ہوسکتی ہے۔

واضح رہے کہ امریکی صدر ڈونلڈ ٹرمپ نے بھی حال ہی میں خطے میں کشیدگی کم کرنے کے معاملے پر امیر قطر سے ٹیلی فونک گفتگو کی تھی، جسے جنگ کے خاتمے کیلئے جاری سفارتی کوششوں کے تناظر میں اہم قرار دیا جا رہا ہے۔

یہ پیشرفت ایسے وقت میں سامنے آئی ہے جب امریکی صدر جنگ ختم کرنے کے خواہاں دکھائی دے رہے ہیں۔ رواں ہفتے ہونے والے امریکی وسط مدتی انتخابات میں ٹرمپ کی ریپبلکن پارٹی کو ڈیموکریٹس کے مقابلے میں شکست کا سامنا کرنا پڑا تھا۔

صدر ٹرمپ طویل عرصے سے یہ مؤقف اختیار کرتے آئے ہیں کہ ایران کے خلاف جنگ کا بنیادی مقصد اسے جوہری ہتھیار بنانے سے روکنا ہے۔

دوسری جانب ایران مسلسل اپنے جوہری پروگرام کو پرامن مقاصد کیلئے قرار دیتا رہا ہے۔ تاہم جوہری سرگرمیوں میں شفافیت بڑھانے اور بعض معاملات پر مذاکرات کیلئے آمادگی تہران اور واشنگٹن کے درمیان ممکنہ امن معاہدے کی راہ ہموار کرسکتی ہے۔