سونے کی قیمت میں اچانک بڑی گراوٹ، دو دن کی تیزی کے بعد فی تولہ 6500 روپے سستا

کراچی (صداۓ سچ نیوز) عالمی اور مقامی گولڈ مارکیٹس میں دو روزہ تیزی کا رجحان ختم ہوگیا، سونے کی قیمت میں اچانک بڑی کمی ریکارڈ کی گئی، جس کے بعد پاکستان میں فی تولہ سونا 6 ہزار 500 روپے سستا ہوگیا۔

آل پاکستان صرافہ جیمز اینڈ جیولرز ایسوسی ایشن کے مطابق 24 کیرٹ فی تولہ سونے کی قیمت 6 ہزار 500 روپے کم ہوکر 4 لاکھ 29 ہزار 136 روپے ہوگئی۔

اسی طرح 10 گرام سونے کی قیمت میں 5 ہزار 573 روپے کی کمی ریکارڈ کی گئی، جس کے بعد نئی قیمت 3 لاکھ 67 ہزار 914 روپے ہوگئی۔

سونے کے ساتھ چاندی کی قیمت میں بھی کمی دیکھی گئی، فی تولہ چاندی 85 روپے سستی ہوکر 5 ہزار 678 روپے پر آگئی۔

عالمی مارکیٹ میں بھی سونا سستا ہوگیا

بین الاقوامی بلین مارکیٹ میں بھی سونے کی قیمت میں نمایاں کمی ریکارڈ کی گئی، جہاں فی اونس سونا 65 ڈالر سستا ہوکر 4 ہزار 66 ڈالر پر آگیا۔

عالمی مارکیٹ میں قیمت 4 ہزار 100 ڈالر کی سطح سے نیچے آنے کے بعد مقامی صرافہ بازاروں میں بھی سونے کے نرخ کم ہوگئے۔

دو روز تک جاری رہنے والی تیزی کے بعد قیمتوں میں اس نمایاں کمی سے سونا خریدنے کے خواہشمند صارفین کو کچھ ریلیف ملنے کی توقع ہے۔