فرانس ہیٹ ویو کی لپیٹ میں ، درجہ حرارت 40 سینٹی گریڈ سے تجاوز

پیرس (صداۓ سچ نیوز) فرانس اس وقت شدید ہیٹ ویو کی لپیٹ میں ہے، جہاں کئی علاقوں میں درجہ حرارت 40 ڈگری سینٹی گریڈ یا اس سے بھی زیادہ ریکارڈ کیا جا رہا ہے۔

 شدید گرمی کے باعث محکمہ موسمیات نے متعدد علاقوں میں ہائی الرٹ جاری کر رکھا ہے، جبکہ شہریوں کو غیر ضروری طور پر دھوپ میں نکلنے سے گریز، زیادہ پانی پینے اور بزرگوں، بچوں اور بیمار افراد کا خصوصی خیال رکھنے کی ہدایت کی گئی ہے۔

صحت کے حکام کے مطابق، حالیہ ہیٹ ویو کے دوران ابتدائی اندازوں کے مطابق تقریباً ایک ہزار اضافی اموات ریکارڈ کی گئی ہیں، جن میں زیادہ تر بزرگ افراد شامل ہیں۔

ادھر موسمیاتی ماہرین نے خبردار کیا ہے کہ گرمی کا یہ سلسلہ ابھی ختم نہیں ہوا۔ آئندہ ایک سے دو ہفتوں میں جولائی کے آغاز پر ایک اور شدید ہیٹ ویو فرانس کے مختلف علاقوں کو متاثر کر سکتی ہے، جس کے باعث درجہ حرارت دوبارہ 40 ڈگری سینٹی گریڈ کے قریب پہنچنے کا امکان ہے۔

حکام نے جنگلات میں آگ لگنے، پانی کی قلت اور صحت کے بڑھتے ہوئے خطرات کے پیش نظر شہریوں سے احتیاطی تدابیر پر سختی سے عمل کرنے کی اپیل کی ہے۔