ٹانک میں چیک پوسٹ پر دہشتگردوں کا حملہ،12 خوارج ہلاک، 15 جوان شہید

ٹانک (صداۓ سچ نیوز) ٹانک میں مشترکہ پولیس چیک پوسٹ پر فتنہ الخوارج کے بزدلانہ حملے میں 12 جوان، 2 پولیس اہلکار اور محکمہ جنگلات کے سرکاری اہلکار سمیت دھرتی کے 15 بیٹے شہید ہو گئے، جبکہ سیکیورٹی فورسز نے جوابی کارروائی میں بھاگنے والے 12 خوارج کو ہلاک کر دیا۔

آئی ایس پی آر کے مطابق ٹانک میں دہشتگردوں نے بارود سے بھری گاڑی مشترکہ پولیس چیک پوسٹ سے ٹکرا دی، جس کے نتیجے میں 12جوان،2پولیس اہلکار اور محکمہ جنگلات کے سرکاری اہلکار سمیت دھرتی کے 15 بیٹے شہید ہو گئے ۔

سیکیورٹی فورسز نے جوابی کارروائی میں بھاگنے والے 12 خوارج کو ہلاک کر دیا، سیکیورٹی فورسز اور قانون نافذ کرنے والے اداروں کا علاقے میں سینی ٹائزیشن آپریشن جاری ہے، دہشتگردی کی لعنت سے پاک کرنے کیلئےآپریشنز پوری رفتار سے جاری رہیں گے،بہادر سپاہیوں کی یہ قربانیاں ہمارے غیر متزلزل عزم کو مزید تقویت دیتی ہیں۔ 

وزیراعظم شہباز شریف نے ٹانک میں مشترکہ چیک پوسٹ پر دہشت گردوں کے بزدلانہ حملے کی شدید مذمت  کی اور  شہید ہونے والے وطن کے سپوتوں کو خراجِ تحسین پیش کیا ۔

وزیراعظم نے حملہ ناکام بنا کر12 خارجيوں کو جہنم واصل کرنے پر سیکیورٹی فورسز کی تعریف کی۔ شہباز شریف نے  12 فوجیوں، 2 پولیس اہلکاروں اور محکمہ جنگلات کےاہلکار کی شہادت پر اظہار رنج و غم  کیا۔

وزیراعظم نے تمام شہدا کے درجات کی بلندی اور سوگوار خاندانوں کیلئے صبرِ جمیل کی دعا  کی۔ انہوں نے کہا کہ پاک سرزمین سے دہشت گردی کا مکمل خاتمہ کئے بغیر سکون سے نہیں بیٹھیں گے۔

وفاقی وزیر مواصلات عبدالعلیم خان نے ٹانک میں مشترکہ چیک پوسٹ پر دہشت گردانہ حملے کی شدید مذمت  کرتے ہوئے کہا کہ ​​وطنِ عزیز کی دفاع کے لیے 15 جوانوں کی عظیم قربانیاں اور بے مثال شجاعت قابلِ تحسین ہے۔

وفاقی وزیر مواصلات کا کہناتھا کہ ​​سیکیورٹی فورسز نے جرات و بہادری سے مقابلہ کرتے ہوئے 12 خارجيوں کو واصلِ جہنم کیا، ​شہداء کا لہو رائیگاں نہیں جائے گا، ملک سے فتنۃ الخوارج کا مکمل خاتمہ کر کے رہیں گے، ​وفاقی وزیر مواصلات کی شہدا کے درجات کی بلندی کے لیے دعا اور غمزدہ خاندانوں سے دلی تعزیت کا اظہار کیا ۔