فیکٹ پر بات کریں، الزامات نہیں لگنے دوں گا، محسن نقوی کا تنقید کرنیوالوں کو جواب

اسلام آباد (صداۓ سچ نیوز) چیئرمین پی سی بی محسن نقوی کا کہنا ہے کہ ہارنے پر تنقید کرنا سب کا حق ہے لیکن ہار کو ایسا بنادیا جاتاہے جیسے پاکستان کرکٹ ختم ہوگئی۔

میڈیا سے گفتگو میں محسن نقوی نے کہا کہ جن کھلاڑیوں نے کچھ نہیں کیا وہ باتیں کریں تو غیرمناسب ہے، کوئی فیکٹ ہے تو ضرور بات کریں،الزامات نہیں لگنے دوں گا۔ سلیکشن میں غلطی ہوجاتی ہے، آپ دیکھیں گے آگے ہم کیا کرتے ہیں۔

محسن نقوی نے کہا کہ پرانے کھلاڑیوں سے مسلسل رائے لیتا رہتاہوں، وسیم اکرم اور وقاریونس کچھ کہیں تو ان کی بات میں وزن ہوگا، قومی ٹیم کی کارکردگی میں بہتری کی ضرورت ہے۔

انہوں نے کہا کہ نئی کوچنگ ٹیم لانے کے بعد ون ڈےمیں ہم 8 ویں سے5ویں نمبر پر آگئے، 6 ون ڈے سیریز میں سے ہم4جیتے ہیں، ٹی ٹوئنٹی میں ہم9ویں نمبر پر تھے،اب چھٹے نمبر پر آگئے۔

چیئرمین پی سی بی کے مطابق نئے کوچزآنے کے بعد کامیابی کی شرح24فیصدسے73فیصد پرچلی گئی، ٹیسٹ میچز میں ہماری کارکردگی بُری ہے، ایسا نہیں ہوسکتا کہ3یا6مہینےمیں ٹیم کو9ویں نمبر سے پہلے نمبر پر لے جائیں۔

محسن نقوی کا کہنا تھا کہ مجھ پر تنقید کریں،لیکن کرکٹ کو ہدف نہ بنائیں، سیریز کا ایک ایک میچ ہمارے لئے اہم ہے، کوئی کارکردگی نہیں دکھارہا تو اس کو تبدیل کرنا چاہیے، آنے والے دنوں میں کارکردگی میں بہتری لائیں گے، ہم اپنی حکمت عملی بنارہے ہیں کہ دنیا کی بڑی ٹیموں کو کیسےہرانا ہے۔