پیٹرولیم مصنوعات کی قیمتوں میں کمی کا فائدہ عوام تک پہنچائیں گے، ایل پی جی کا کوٹہ سسٹم ختم کرنے کا فیصلہ، علی پرویز ملک

اسلام آباد (صداۓ سچ نیوز) وفاقی وزیر پیٹرولیم علی پرویز ملک نے کہا ہے کہ حکومت پیٹرولیم مصنوعات کی قیمتوں میں کمی کا فائدہ عوام تک پہنچائے گی، جبکہ ایل پی جی کے شعبے میں کوٹہ سسٹم ختم کرکے مقامی گیس کی نیلامی کا نظام متعارف کرایا جائے گا۔

پریس کانفرنس سے خطاب کرتے ہوئے علی پرویز ملک نے کہا کہ وزیراعظم نے کمزور طبقے کے تحفظ کی ہدایت کی ہے۔ 28 فروری سے شروع ہونے والی جنگ کے باعث آج بھی مشکلات کا سامنا ہے، تاہم عالمی منڈی میں تیل کی قیمتوں میں کمی ہوئی ہے اور عوام کے لیے اچھی خبر متوقع ہے۔

انہوں نے کہا کہ بعض عناصر عوام کی مشکلات سے فائدہ اٹھاتے ہوئے منافع خوری کی کوشش کر رہے ہیں۔ گزشتہ روز ریفائنریز نے بھی حکومت کو سہارا دیا، جبکہ وفاقی حکومت نے 130 ارب روپے کے وسائل استعمال کیے ہیں۔

وفاقی وزیر کا کہنا تھا کہ چند عناصر نے ایل پی جی مارکیٹ میں بھی عوام کی مجبوریوں سے فائدہ اٹھایا۔ حکومت پیٹرولیم مصنوعات کی قیمتوں میں کمی کا فائدہ عوام تک پہنچائے گی۔ وزیراعظم خود انرجی سکیورٹی کے نظام کی نگرانی کر رہے ہیں، جبکہ حکومت مہنگا ترین ایندھن خریدنے کی کوشش بھی کرے گی۔

علی پرویز ملک نے کہا کہ کھانے کے اوقات میں گھروں کو گیس فراہم کرنے کی کوشش کی جائے گی۔ اب تک ڈیڑھ کروڑ افراد کو سبسڈائزڈ پیٹرول فراہم کیا جا چکا ہے۔

ایل پی جی کے شعبے میں اصلاحات سے متعلق انہوں نے کہا کہ 2016 میں ایل پی جی پالیسی متعارف کرائی گئی تھی، تاہم گزشتہ 50 سال سے اس شعبے میں چند عناصر کا گٹھ جوڑ قائم تھا، جس کے باعث اربوں روپے مخصوص افراد کی جیبوں میں جاتے رہے۔

انہوں نے واضح کیا کہ حکومت کوٹہ سسٹم ختم کرے گی اور تمام کمپنیوں کو مقامی ایل پی جی کی نیلامی کی ہدایت کی جائے گی۔ اس ضمن میں تقریباً آٹھ کمپنیوں کو نیلامی کا عمل مکمل کرنا ہوگا۔