ڈیموکریٹس کی کامیابی، ٹرمپ کے سیاسی مستقبل پر سوالیہ نشان لگ گیا

واشنگٹن (صداۓ سچ نیوز) امریکی وسط مدتی انتخابات میں ڈیموکریٹس کی بڑی کامیابی نے صدر ڈونلڈ ٹرمپ اور ری پبلکن پارٹی کے لیے سیاسی مشکلات کھڑی کر دیں، کانگریس کے دونوں ایوانوں میں اکثریت کھونے کے بعد ٹرمپ کی سیاسی گرفت اور پارٹی پر ان کے اثر و رسوخ کے مستقبل پر سوالات اٹھنے لگے ہیں۔

برطانوی اخبار دی گارڈین کے تجزیے کے مطابق ڈیموکریٹس نے کنساس، ٹیکساس اور جنوبی کیرولائنا سمیت ان علاقوں میں بھی کامیابی حاصل کی جو روایتی طور پر ری پبلکنز کے مضبوط گڑھ سمجھے جاتے تھے۔ انتخابی نتائج سے ظاہر ہوتا ہے کہ مہنگائی، بڑھتے اخراجاتِ زندگی اور حکومتی بدعنوانی ووٹرز کے اہم مسائل رہے، جبکہ ایران کے خلاف جنگ اور ٹرمپ کی تجارتی پالیسیوں نے بھی ری پبلکنز کی انتخابی مشکلات میں اضافہ کیا۔

کانگریس میں اکثریت حاصل کرنے کے بعد ڈیموکریٹس جنوری سے ٹرمپ انتظامیہ کے خلاف تحقیقات شروع کرنے، حکومتی قانون سازی روکنے اور اہم حکومتی و عدالتی تقرریوں میں رکاوٹ ڈالنے کی پوزیشن میں ہوں گے۔ دی گارڈین کے مطابق ڈیموکریٹس صدر ٹرمپ کے مواخذے کی تیسری کوشش پر بھی غور کر سکتے ہیں، جس سے وائٹ ہاؤس اور کانگریس کے درمیان محاذ آرائی مزید شدت اختیار کر سکتی ہے۔

تجزیے میں کہا گیا ہے کہ انتخابی شکست کے باوجود ٹرمپ کے سیاسی دور کے خاتمے کا اعلان قبل از وقت ہوگا، تاہم کانگریس میں ڈیموکریٹس کی بالادستی ان کے لیے آئندہ دو سال مشکل بنا سکتی ہے۔ 2028 کے صدارتی انتخابات کی تیاری کے ساتھ ری پبلکن پارٹی میں نئی قیادت کی دوڑ بھی تیز ہونے کا امکان ہے، جس سے پارٹی پر ٹرمپ کی گرفت متاثر ہو سکتی ہے۔

اخبار نے خبردار کیا ہے کہ انتخابی شکست کے بعد ٹرمپ آئندہ دو برسوں میں مزید غیر متوقع اقدامات کر سکتے ہیں، جبکہ ان کی انتظامیہ اور ڈیموکریٹس کے درمیان سیاسی کشیدگی میں اضافے کا بھی امکان ہے۔