چیئرمین سینیٹ یوسف رضا گیلانی کا شمالی وزیرستان آپریشن پر سیکیورٹی فورسز کو خراجِ تحسین

اسلام آباد (صداۓ سچ نیوز) چیئرمین سینیٹ سید یوسف رضا گیلانی نے شمالی وزیرستان میں دہشتگردوں کے خلاف کامیاب انٹیلیجنس بیسڈ آپریشن پر سکیورٹی فورسز کو خراجِ تحسین پیش کیا ہے۔

ہفتہ کوسینیٹ سیکرٹریٹ سے جاری بیان میں انہوں نے کہا کہ شمالی وزیرستان آپریشن میں فتنہ الخوارج کے 16 دہشتگردوں کو ہلاک کرنا سکیورٹی فورسز کی پیشہ ورانہ مہارت اور عزم کا مظہر ہے۔

چیئرمین سینیٹ نے حوالدار عصمت علی اور نائیک آفتاب علی کی شہادت پر خراجِ عقیدت پیش کیا۔چیئرمین سینیٹ نے کہا کہ شہداء کی قربانیاں قومی تاریخ کا ناقابلِ فراموش باب اور پوری قوم کے لیے باعثِ فخر ہیں، پاکستان کے امن، استحکام اور خودمختاری کو نقصان پہنچانے والے عناصر اپنے مذموم عزائم میں کامیاب نہیں ہوں گے۔

چیئرمین سینیٹ نے کہا کہ دہشتگردی کے مکمل خاتمے کے لیے قومی یکجہتی اور اداروں کے درمیان مؤثر تعاون ناگزیر ہے، پوری قوم دہشتگردی کے خلاف جنگ میں اپنی سکیورٹی فورسز کے شانہ بشانہ کھڑی ہے۔

انہوں نے کہا کہ شہداء کی قربانیاں رائیگاں نہیں جائیں گی، پاکستان میں پائیدار امن کا قیام ہمارا مشترکہ عزم ہے۔چیئرمین سینیٹ نےشہداء کے اہلِ خانہ سے دلی تعزیت، صبرِ جمیل اور شہداء کے درجات کی بلندی کے لیے دعا کی