دبئی میں اوریکل ڈیٹا سینٹر پر ایرانی حملے کی خبر جھوٹی قرار، یو اے ای کی سخت تردید

دبئی (صداۓ سچ نیوز) متحدہ عرب امارات نے دبئی میں امریکی ٹیکنالوجی کمپنی اوریکل کے ڈیٹا سینٹر پر ایرانی حملے کی خبروں کو مکمل طور پر مسترد کرتے ہوئے انہیں جعلی قرار دے دیا۔

دبئی گورنمنٹ میڈیا آفس نے سوشل میڈیا پلیٹ فارم ایکس پر جاری کیے گئے بیان میں کہا ہے کہ ایرانی پاسدارانِ انقلاب کی جانب سے دبئی میں کسی حملے یا حملے کی کوشش کی اطلاعات بے بنیاد اور گمراہ کن ہیں۔ 

دبئی کے حکام نے عوام کو خبردار کیا ہے کہ کشیدہ علاقائی صورتِ حال میں غیر مصدقہ خبروں کو وائرل کرنے سے گریز کیا جائے اور صرف سرکاری ذرائع پر اعتماد کیا جائے۔

یہ وضاحت اس وقت سامنے آئی جب ایرانی سرکاری میڈیا نے دعویٰ کیا تھا کہ پاسدارانِ انقلاب نے امریکی کمپنی اوریکل کے دبئی میں قائم ڈیٹا سینٹر اور ایمیزون کے بحرین میں موجود کلاؤڈ سینٹر کو نشانہ بنایا ہے۔

ایرانی حکام کے مطابق یہ کارروائیاں امریکا اور اسرائیل کی جانب سے ایران پر حملوں کے ردِعمل میں کی گئیں جبکہ ایران نے خطے میں کام کرنے والی کئی امریکی ٹیکنالوجی کمپنیوں کو ممکنہ اہداف قرار دیا تھا۔

دوسری جانب دبئی حکام کا کہنا ہے کہ شہر میں کسی قسم کے حملے یا نقصان کی کوئی تصدیق نہیں ہوئی ہے اور گردش کرنے والی خبریں حقیقت پر مبنی نہیں ہیں۔