برطانیہ کا جنگی بحری جہاز مشرق وسطیٰ میں تعینات

لندن (صداۓ سچ نیوز) برطانیہ میں مشرق وسطیٰ میں اپنا جنگی بحری جہاز ایچ ایم ایس ڈریگن تعینات کردیا ہے۔

خبر ایجنسی رائٹرز کے مطابق برطانیہ نے مشرق وسطیٰ میں بڑھتی کشیدگی اور آبنائے ہرمز میں عالمی بحری تجارت کو لاحق خطرات کے پیش نظر اپنا جنگی بحری جہاز تعینات کیا ہے۔

اس اقدام کا مقصد مستقبل میں ممکنہ کثیر الملکی بحری مشن کی تیاری کرنا ہے، جو برطانیہ اور فرانس کی مشترکہ قیادت میں تشکیل پاسکتا ہے۔

ایچ ایم ایس ڈریگن جدید فضائی دفاعی ڈسٹرائر ہے، مارچ میں اسے قبرص کے دفاع کےلیے مشرقی بحیرہ روم بھیجا گیا تھا۔

خبر ایجنسی کے مطابق فرانس پہلے ہی اپنا بحری اسٹرائیک گروپ جنوبی بحیرۂ احمر میں بھیج چکا ہے جبکہ دونوں یورپی طاقتیں خطے میں تجارتی راستوں کے تحفظ اور عالمی اعتماد کی بحالی کے لیے مشترکہ دفاعی حکمت عملی پر کام کر رہی ہیں۔

یہ بھی پڑھیں: ایران امریکہ مذاکرات اسلام آباد میں متوقع، حکومت کا اداروں کو تیاریاں مکمل کرنے کا عندیہ

تجزیہ کاروں کے مطابق یہ پیشرفت ایسے وقت میں سامنے آئی ہے جب امریکا اور ایران کے درمیان جاری 10 ہفتوں کی جنگ میں ممکنہ کمی یا سفارتی پیشرفت کے آثار دکھائی دے رہے ہیں۔

مجوزہ منصوبے کے تحت آبنائے ہرمز میں محفوظ بحری آمد و رفت بحال کرنے کے لیے ایران سمیت متعدد ممالک کے ساتھ تعاون ضروری ہوگا، تاہم برطانیہ کو اپنی محدود بحری صلاحیتوں اور رائل نیوی کے کم ہوتے وسائل جیسے چیلنجز کا بھی سامنا ہے۔