ایڈیشنل ڈی جی ایف آئی اے ساؤتھ مجاہد اکبر خان کا کوئٹہ بلوچستان زون آفس کا دورہ، کارکردگی اور جاری تعمیراتی منصوبوں کا جائزہ

کوئٹہ (صدائے سچ نیوز) فیڈرل انویسٹی گیشن ایجنسی ساؤتھ کے ایڈیشنل ڈائریکٹر جنرل مجاہد اکبر خان نے بلوچستان زون آفس کوئٹہ کا اعلیٰ سطحی دورہ کیا۔ دورے کے دوران اینٹی کرپشن ونگ ایف آئی اے ہیڈکوارٹرز اسلام آباد سے ایڈیشنل ڈائریکٹر جنرل محمد ادریس احمد بھی ان کے ہمراہ تھے۔ بلوچستان زون آفس پہنچنے پر سینئر افسران نے معزز مہمانوں کا پرجوش استقبال کیا۔

ایڈیشنل ڈی جی مجاہد اکبر خان نے زونل آفس میں جاری مختلف تعمیراتی کاموں کا تفصیلی معائنہ کیا اور تعمیری معیار کو سراہا۔
ڈائریکٹر بلوچستان زون محمد بہرام خان نے وفد کو زونل آفس کے انتظامی امور، درپیش چیلنجز اور ان کے حل کے لیے کیے گئے اقدامات پر مفصل بریفنگ دی۔

معزز مہمانوں کو صوبے بھر میں جرائم کی روک تھام، جاری تحقیقات اور ایف آئی اے بلوچستان زون کی مجموعی کارکردگی پر جامع پریزنٹیشن دی گئی۔

ایڈیشنل ڈی جی مجاہد اکبر خان نے بلوچستان زون کی مجموعی کارکردگی اور افسران کی پیشہ ورانہ صلاحیتوں پر مکمل اطمینان کا اظہار کیا۔ انہوں نے افسران کو سخت ہدایات جاری کیں کہ عوامی شکایات کا ازالہ فوری کیا جائے اور قانون کی بالادستی کو یقینی بنانے کے لیے تمام دستیاب وسائل بروئے کار لائے جائیں۔