سیکٹر ایف۔14 اور ایف۔15 کو اسلام آباد کا جدید ترین گرین سٹی بنانے کے عملی اقدامات شروع

اسلام آباد (صداۓ سچ نیوز) فیڈرل گورنمنٹ ایمپلائز ہاؤسنگ اتھارٹی کے سیکٹر F-14 اور F-15 کو پاکستان کے جدید ترین، خوبصورت اور ماحول دوست رہائشی سیکٹرز میں تبدیل کرنے کے لیے عملی اقدامات کا آغاز کر دیا گیا ہے۔ اس سلسلے میں سیکریٹری ہاؤسنگ اینڈ ورکس جناب کیپٹن ریٹائرڈ محمد محمود اور ڈائریکٹر جنرل فیڈرل گورنمنٹ ایمپلائز ہاؤسنگ اتھارٹی جناب کیپٹن ریٹائرڈ ظفر اقبال کی خصوصی ہدایات کی روشنی میں اتھارٹی کی ٹیکنیکل ٹیم نے ہارٹیکلچر، لینڈ اسکیپنگ اور ماحولیاتی خوبصورتی کے جامع منصوبے پر کام تیز کر دیا ہے۔

اس سلسلے میں آج ہارٹیکلچر کے معروف ماہر اور کیپیٹل ڈیولپمنٹ اتھارٹی (CDA) کے ایڈوائزر ڈاکٹر پرویز احسن خان نے فیڈرل گورنمنٹ ایمپلائز ہاؤسنگ اتھارٹی کے انجینئرز اور ٹیکنیکل ٹیم کے ساتھ ایک تفصیلی اجلاس میں شرکت کی۔ اجلاس کے بعد انہوں نے سیکٹر F-14 اور F-15 کا تفصیلی دورہ کیا، جہاں انہوں نے قدرتی ماحول کو محفوظ رکھتے ہوئے عالمی معیار کے لینڈ اسکیپ، شجرکاری اور تفریحی سہولیات کی منصوبہ بندی کے حوالے سے اہم تکنیکی تجاویز اور ہدایات جاری کیں۔
دورے کے دوران مختلف مقامات کا تفصیلی جائزہ لیا گیا اور فیصلہ کیا گیا کہ سیکٹر F-14 اور F-15 کو روایتی ہاؤسنگ اسکیموں سے منفرد شناخت دینے کے لیے جدید ہارٹیکلچر، ماحول دوست انفراسٹرکچر اور قدرتی حسن کے فروغ پر خصوصی توجہ دی جائے گی۔

منصوبے کے تحت جدید طرز کے چیک ڈیمز تعمیر کیے جائیں گے تاکہ بارش کے پانی کو محفوظ بنا کر زیر زمین پانی کی سطح بہتر کی جا سکے۔ اسی طرح وسیع پیمانے پر جدید نرسریاں قائم کی جائیں گی، جہاں ہزاروں اقسام کے پودے اور درخت تیار کیے جائیں گے تاکہ پورے سیکٹر کو سرسبز و شاداب بنایا جا سکے۔

عوام کو صحت مند اور معیاری تفریحی سہولیات فراہم کرنے کے لیے جدید سائیکل ٹریکس، پیدل چلنے کے خوبصورت راستے، ویو پوائنٹس، ریگولیشن پوائنٹس، آرام دہ سٹنگ ایریاز، بوٹنگ پوائنٹس اور قدرتی مناظر سے ہم آہنگ سسپنشن برجز بھی

منصوبے کا حصہ ہوں گے، جو سیکٹر F-14 اور F-15 کو اسلام آباد کے منفرد اور پرکشش رہائشی علاقوں میں شامل کریں گے۔
اجلاس میں منصوبے کے کنسلٹنٹ M/s عثمانی اینڈ کمپنی کو ہدایت کی گئی کہ وہ تمام ڈیزائنز اور ماسٹر پلان میں جدید ہارٹیکلچر، لینڈ اسکیپنگ اور ماحول دوست سہولیات کو ترجیحی بنیادوں پر شامل کریں۔ اسی طرح نیشنل لاجسٹکس کارپوریشن (NLC) کے نمائندوں کے ساتھ بھی تفصیلی اجلاس منعقد ہوا، جس میں ان کے دائرۂ کار میں نرسریوں کے قیام، چیک ڈیمز کی تعمیر اور گرین انفراسٹرکچر سے متعلق کام شامل کرنے کا فیصلہ کیا گیا۔

سیکٹر F-14 میں موجود قدرتی غار (Natural Cave) اور قدرتی جھیل (Natural Lake) کو محفوظ رکھتے ہوئے جدید انجینئرنگ اور لینڈ اسکیپنگ کے ذریعے انہیں ایک منفرد تفریحی اور ماحولیاتی مقام کی حیثیت دی جائے گی تاکہ یہ مقامات نہ صرف رہائشیوں بلکہ پورے وفاقی دارالحکومت کے لیے کشش کا مرکز بن سکیں۔

ڈائریکٹر جنرل فیڈرل گورنمنٹ ایمپلائز ہاؤسنگ اتھارٹی جناب کیپٹن ریٹائرڈ ظفر اقبال نے اس موقع پر کہا کہ سیکٹر F-14 اور F-15 کی ترقی صرف بنیادی انفراسٹرکچر تک محدود نہیں رہے گی بلکہ انہیں جدید شہری منصوبہ بندی، ماحول دوست ترقی، قدرتی حسن اور عالمی معیار کی عوامی سہولیات کا نمونہ بنایا جائے گا۔ ان کا کہنا تھا کہ اتھارٹی کا عزم ہے کہ یہ منصوبہ مستقبل میں وفاقی دارالحکومت کی بہترین رہائشی اسکیموں میں نمایاں مقام حاصل کرے گا اور شہریوں کو ایک خوبصورت، پائیدار اور معیاری رہائشی ماحول فراہم کرے گا۔