ورکرز ویلفیئر فنڈ اور نادرا کے درمیان تاریخی معاہدہ، محنت کشوں، خاندانوں کے لیے شفاف، مؤثر اور جدید ویریفکیشن نظام متعارف

اسلام آباد (صدائے سچ نیوز) ورکرز ویلفیئر فنڈ اور نادرا کے درمیان گذشتہ روز ایک اہم اور تاریخی معاہدے پر دستخط کیے گئے، جس کا مقصد ورکرز ویلفیئر فنڈ کے نظام میں شفافیت کو یقینی بنانا اور فلاحی خدمات کی فراہمی کو مزید مؤثر اور جدید بنانا ہے۔

اس معاہدے کے تحت محنت کشوں اور ان کے اہل خانہ کی معلومات کی ریل ٹائم ویریفکیشن ممکن بنائی جائے گی تاکہ فلاحی سہولیات کی فراہمی کو جدید خطوط پر استوار کیا جا سکے۔

تفصیلات کے مطابق معاہدے پر ورکرز ویلفیئر فنڈ کی جانب سے سیکرٹری ذوالفقار احمد جبکہ نادرا کی جانب سے چیف پروجیکٹ آفیسر رحمان قمر نے دستخط کیے۔

اس معاہدے کے تحت نادرا، ورکرز ویلفیئر فنڈ کو جدید ڈیجیٹل ویریفکیشن سہولیات فراہم کرے گا، جن کے ذریعے مختلف فلاحی اسکیموں میں درخواست دہندگان اور ان کے خاندانوں کی فوری تصدیق ممکن ہو سکے گی۔ ان سہولیات میں میرج گرانٹ، ڈیتھ گرانٹ ‘ تعلیمی وظائف اور دیگر فلاحی پروگراموں سے متعلق تمام ضروری ویریفکیشنز شامل ہوں گی۔

اس موقع پر سیکرٹری ورکرز ویلفیئر فنڈ ذوالفقار احمد نے کہا کہ وفاقی وزیر چوہدری سالک حسین کا وژن ہے کہ ورکرز ویلفیئر فنڈ کے ادارے میں جامع شفافیت کو یقینی بنایا جائے اور ایسے عملی اقدامات کیے جائیں جن کے ذریعے حقیقی معنوں میں سوشل جسٹس اور سوشل پروٹیکشن کو فروغ دیا جا سکے۔

انہوں نے مزید کہا کہ اس معاہدے کے نتیجے میں ورکرز ویلفیئر فنڈ کے نظام میں نہ صرف شفافیت بڑھے گی بلکہ خدمات کی فراہمی بھی تیز اور مؤثر ہوگی، جس سے لاکھوں محنت کش براہِ راست مستفید ہوں گے۔

اس منصوبے سے ملک بھر میں رجسٹرڈ 19 لاکھ سے زائد محنت کشوں اور ان کے خاندانوں کو فائدہ پہنچے گا، جبکہ فلاحی اسکیموں میں غیر ضروری تاخیر کا خاتمہ بھی ممکن بنایا جا سکے گا۔