جون میں بجلی کی قیمت میں اضافہ نہیں ہوگا، صارفین کو 38 ارب روپے کے اضافی بوجھ سے بچا لیا گیا، پاور ڈویژن

اسلام آباد (صداۓ سچ نیوز) ترجمان پاور ڈویژن کا کہنا ہے کہ جون میں بجلی کی قیمت میں اضافہ نہیں ہوگا، صارفین کو 38 ارب روپے کے اضافی بوجھ سے بچا لیا گیا۔

ترجمان کے مطابق بجلی صارفین کو 5 سے 6 روپے فی یونٹ ماہانہ فیول ایڈجسٹمنٹ کے بوجھ سے بچا لیا گیا ہے، ایل این جی بندش اور مہنگے فرنس آئل کے استعمال کے باوجود صارفین پر اضافی بوجھ نہیں پڑے گا۔

پاور ڈویژن کے مطابق ممکنہ طور پر صارفین پر پڑنے والے 38 ارب روپے کے اضافی بوجھ کو روکا گیا ہے جبکہ ماہانہ فیول ایڈجسٹمنٹ کو 1.73 روپے فی یونٹ اضافے پر محدود رکھا گیا۔

ترجمان نے کہا کہ پالیسیوں کے تسلسل، بجلی کی طلب میں اضافے اور اسپیشل پیکیج کی بدولت صارفین کو ریلیف دیا گیا۔

یہ بھی پڑھیں: ملک میں سونے کی فی تولہ قیمت میں معمولی اضافہ

انہوں نے بتایا کہ مقامی گیس کی اضافی فراہمی اور درآمدی کول پلانٹس سے پیداوار کے ذریعے لوڈ مینجمنٹ کو کم کیا گیا۔

ترجمان پاور ڈویژن کے مطابق پہلی سہ ماہی میں بجلی صارفین کو 65 ارب روپے کی واپسی ممکن ہوئی جبکہ سہ ماہی ایڈجسٹمنٹ کی بدولت صارفین کو 1.93 روپے فی یونٹ ریلیف دیا گیا۔

ترجمان کا کہنا تھا کہ سہ ماہی ایڈجسٹمنٹ نے ماہانہ فیول ایڈجسٹمنٹ کے اثرات کو مکمل طور پر ختم کردیا ہے۔

انہوں نے مزید کہا کہ آئندہ ماہ ریفرنس ٹیرف میں بھی کسی اضافے کا امکان نہیں بلکہ تقریباً 20 پیسے فی یونٹ تک ریلیف ملنے کی توقع ہے۔