بھارت، عمارت پر کچرے کا ڈھیر گرنے سے 8 افراد ہلاک

نئی دہلی (صداۓ سچ نیوز) بھارت میں کچرے کا ڈھیر عمارت پر گرنے کے باعث کچرے تلے دب کر 8 افراد ہلاک ہوگئے۔

بھارتی میڈیا کے مطابق یہ واقعہ شہر پونے میں آیا جب پمپری چنچواڑ میونسپل کارپوریشن کے زیرِ انتظام موشی گاربیج ڈپو میں کچرے کا ایک بہت بڑا ڈھیر انتظامی عمارت پر آگرا، یہ کچرے کا ڈھیر انرجی بنانے  والے ایک پروجیکٹ کے تحت جمع کیا گیا تھا۔

میڈیا رپورٹس میں بتایا گیا ہے کہ اس حادثے کے نتیجے میں 23 افراد پھنس گئے تھے، جن میں سے 22 افراد عمارت کے اندر اور ایک شخص عمارت کے باہر کچرے تلے دب گیا تھا تاہم خوش قسمتی سے 5 افراد حادثے کے فوراً بعد ہی بحفاظت باہر نکلنے میں کامیاب ہو گئے۔

میڈیا رپورٹس کے مطابق واقعے کی اطلاع ملتے ہی ریسکیو آپریشن شروع کیا گیا جس میں بھارتی فوج سمیت مختلف ریسکیو اداروں نے حصہ لیا۔

انتظامیہ کے مطابق حادثے میں اب تک 8 افراد ہلاک ہوچکے ہیں جبکہ ایک شخص کے لاپتہ ہونے کا خدشہ ہے جس کی تلاش کیلئے آپریشن جاری ہے، اس کے علاوہ عمارت کو بھی نقصان پہنچا ہے۔