لبنانی صدر اپنے ساتھ کھڑے لوگوں کو بیچتے ہیں: اسماعیل بقائی

تہران (صدائے سچ نیوز) ترجمان ایرانی وزارتِ خارجہ اسماعیل بقائی نے لبنانی صدر جوزف عون کے بیان پر سخت ردِعمل دے دیا۔

جاری کیے گئے بیان میں انہوں نے کہا ہے کہ لبنانی صدر اپنے ساتھ کھڑے لوگوں کو بیچتے ہیں اور اپنے خلاف کھڑے لوگوں سے خریدتے ہیں۔

اسماعیل بقائی کا کہنا ہے کہ لبنانی صدر نے اپنے حمایتیوں کو چھوڑ دیا، اپنا گلا گھوٹنے والوں کے پیچھے چل رہے ہیں۔

اس سے قبل ایرانی وزیرِ خارجہ عباس عراقچی نے ایران پر لبنان کے معاملات میں مداخلت کرنے کے لبنانی صدر جوزف عون کے بیان کو ہدفِ تنقید بنایا۔

یہ بھی پڑھیں: امریکا کا ایران میں تنصیبات پر حملہ، جوابی کارروائی میں پاسدارانِ انقلاب کا امریکی فضائی اڈوں کو میزائلوں سے نشانہ بنانے کا دعویٰ

سماجی رابطے کی ویب سائٹ ایکس پر جاری کیے گئے بیان میں عباس عراقچی نے کہا ہے کہ صدر عون کے بیانات سن کر ایسا لگتا ہے جیسے لبنان کے پانچویں حصے پر ایران نے قبضہ کر رکھا ہو، چوتھائی لبنانی آبادی کو ایران نے بے گھر کیا ہو اور روزانہ بمباری بھی ایران ہی کر رہا ہو۔

ایرانی وزیرِ خارجہ نے لبنانی صدر جوزف عون کو مخاطب کر کے کہا کہ جنابِ صدر! لبنان کو اصل دشمن سے بچائیں، امریکا کے ساتھ لبنان کارڈ استعمال کرنا ہوتا تو معاہدہ کافی پہلے ہو چکا ہوتا۔

واضح رہے کہ لبنانی صدر جوزف عون نے سی این این کو حالیہ انٹرویو میں کہا تھا کہ ایران امریکا کے ساتھ جنگ کے خاتمے کے لیے جاری مذاکرات میں لبنان کو سودے بازی کے مہرے کے طور پر استعمال کر رہا ہے، ایران کو لبنان کے معاملات میں مداخلت نہیں کرنی چاہیے۔