کراچی میں اسٹریٹ کرائم میں پھر اضافہ، اگست میں ہوئی وارداتوں نےگزشتہ7 ماہ کے ریکارڈ توڑ ڈالے

کراچی (صداۓ سچ نیوز) کراچی میں اسٹریٹ کرائم کی وارداتوں میں ایک بار پھر اضافہ ہوگیا ہے، سی پی ایل سی کی رپورٹ کے مطابق اگست میں اسٹریٹ کرائم کی وارداتوں نےگزشتہ سات ماہ کے ریکارڈ توڑ ڈالے ہیں۔

سی پی ایل سی نے کراچی کے جرائم پر مبنی تازہ رپورٹ جاری کردی ہے جس کے مطابق اگست میں اسٹریٹ کرائم کی 5 ہزار 204 وارداتیں سامنے آئیں۔ موٹر سائیکل چوری کی 2 ہزار 678، گاڑی چوری کی 124 وارداتیں ہوئیں۔

رپورٹ کے مطابق اسلحے کے زور پر شہریوں سے 1884 موبائل فونز، 502 موٹر سائیکل اور 16 گاڑیاں چھینی گئیں۔

رپورٹ بتاتی ہےکہ اگست میں بھتہ خوری کے 8واقعات سامنے آئے، قتل و غارت گری میں 44 افرادکی جان گئی۔

اعدادوشمار کے مطابق جولائی کی نسبت اگست میں سب سے زیادہ گاڑی چھیننے کی شرح میں 33 فیصد جب کہ چوری کی شرح میں 13 فیصد اضافہ ہوا۔

اسی طرح موبائل فونز اور موٹرسائیکل چھینے جانے کی وارداتوں میں بھی اضافہ سامنے آیا ہے۔

ریکارڈ کے مطابق رواں سال کےابتدائی 8 ماہ میں اسٹریٹ کرائم کی مجموعی وارداتوں کی تعداد 39 ہزار 98 تک جا پہنچی ہے۔