وزیر اعظم شہباز شریف کا لائیو سٹاک سیکٹر کی ترقی اور ‘سفید انقلاب’ کے لیے انقلابی اقدام تاریخ ساز ہے، خورشید احمد قریشی

​اسلام آباد (صداۓ سچ نیوز) صدر آل پاکستان جمیعت القریش میٹ ویلفیئر ایسوسی ایشن و ممبر لائیوسٹاک اینڈ ڈیری ڈویلپمنٹ بورڈ خورشید احمد قریشی نے وزیراعظم سیکرٹریٹ میں لائیوسٹاک کی ترقی، منہ کھُر (FMD) سے پاک زونز کے قیام اور مقامی سطح پر 30 کروڑ ویکسین خوراکوں کی تیاری کے حوالے سے منعقدہ عالی شان قومی سیمینار اور وزیراعظم میاں محمد شہباز شریف کے تاریخی وژن کا پرجوش خیرمقدم کرتے ہوئے اسے لائیوسٹاک و میٹ انڈسٹری کا سنہری دور قرار دیا ہے۔

اپنے ایک خصوصی بیان میں خورشید احمد قریشی نے کہا کہ وزیراعظم پاکستان میاں محمد شہباز شریف کی ذاتی دلچسپی اور قائدانہ بصیرت کے باعث لائیوسٹاک اور ڈیری سیکٹر کو قومی معیشت کا بنیادی ستون تسلیم کرنا ایک انتہائی شاندار اور خوش آئند اقدام ہے، جس سے ملک میں دودھ اور اعلیٰ معیار کے حلال گوشت کی پیداوار میں بے پناہ اضافہ ہوگا۔

​انہوں نے کہا کہ منہ کھُر بیماری سے پاک زونز کے قیام اور مقامی سطح پر ویکسین کی تیاری سے جہاں ہمارے مال مویشی مہلک بیماریوں سے محفوظ رہیں گے، وہیں عالمی منڈیوں اور خلیجی ممالک کو حلال گوشت کی برآمدات بڑھا کر ملک کے لیے اربوں ڈالرز کا قیمتی زرِ مبادلہ کمایا جا سکے گا۔

خورشید احمد قریشی کا کہنا تھا کہ ساہیوال، نیلی راوی، چولستانی اور ریڈ سندھی جیسی بہترین نسلوں کی افزائش اور جدید پروسیسنگ ٹیکنالوجی کا استعمال ملک میں حقیقی ‘سفید انقلاب’ برپا کرے گا، جس سے کسانوں، مویشی پال بھائیوں، قصاب برادری اور پروسیسنگ صنعت سے وابستہ لاکھوں افراد کی معاشی حالت مستحکم ہوگی۔

​خورشید احمد قریشی نے مزید کہا کہ وزیراعظم شہباز شریف کا یہ اقدام میٹ پروسیسرز، فارمرز اور لائیوسٹاک تاجروں کے دل کی آواز ہے اور اس سے پوری صنعت میں خوشی و مسرت کی لہر دوڑ گئی ہے۔ انہوں نے اس عزم کا اظہار کیا کہ آل پاکستان جمیعت القریش میٹ ویلفیئر ایسوسی ایشن اور لائیوسٹاک اینڈ ڈیری ڈیولپمنٹ بورڈ اس انقلابی وژن کی مکمل حمایت کرتے ہیں اور ملک کو معاشی خودکفالت کی طرف گامزن کرنے کے لیے حکومت کے ساتھ ہر ممکن تعاون جاری رکھیں گے۔