واہ اسلامی جمہوریہ

تحریر: تنویر حسین

نورپور شاہاں بری امام میں اج آپریشن کا دوسرا دن تھا۔ متاثرین کے گھروں کو تجاوزات قرار دے کر ہیوی مشینری سے بلڈوز کیا جاتا رہا ہے ۔ مکینوں کو اتنی مہلت بھی نہیں دی گئی کہ وہ اپنا سامان تک نکال سکیں۔ آج بھی پولیس کی بھاری نفری نے تمام راستے بند کر کے پورے علاقے کو محاصرے میں رکھا۔ سارا دن محلہ نوری باغ میں ہیوی مشینری سے مکانات کے چھت گرائے جاتے رہے۔ دروازے، کھڑکیاں اور گھریلو سامان پوری طرح متاثرین کو نکالنے نہیں دیا گیا۔ یوں ہر خاندان کو لاکھوں روپے کا نقصان پہنچایا گیا۔ اور کوئی جواب دہ نہیں ۔

چھت کا سامان ٹی آئرن ، چوکے، دروازے، کھڑکیاں ، چولہے، واش بیسن، پانی کی ٹینکیاں، بجلی کا سامان ، الماریاں، پیٹیاں، گھریلو فرنیچر اور دیگر سامان بہت سارے گھروں سے نکالنے کا موقع نہ دیا گیا۔ ہیوی مشینری کے زریعے پہلے ایک مکان گرایا جاتا ، پھر دوسرے مکان کا ملبہ اس پر ڈال دیا جاتا ہے۔ تاکہ سامان مکمل طور پر ضائع ہو جائے۔ اور ساتھ ڈمپروں میں لوڈ کر کے سی ڈی اے اپنے قبضے میں لے لیتا ہے یا اسے کسی کچرے میں پھینک دیا جاتا ہے۔

یہ بھی پڑھیں: جب زمین کی قیمت انسان کی قیمت سے بڑھ جائے

اس سارے عمل میں لوگوں کو ذہنی وجسمانی اذیت دینے کے ساتھ ساتھ ان کی معاشی تباہی کی جاتی رہی۔ حالات یہ ہیں کہ لوگوں کے پاس اتنے پیسے نہیں کہ وہ اپنا سامان کسی مقام پر لے جا سکیں۔ گھر تباہ، گھریلو سامان برباد، کرائے کے مکان کے لئے ایڈوانس کرایا نہیں۔ نزدیک ترین علاقے بھارہ کہو میں پہلے ہی مکان کرائے پر نہیں ملتا۔ کیونکہ اس سے پہلے سید پور اور مسلم کالونی کے ہزاروں خاندان پچھلے چھ ماہ کے دوران گھروں سے نکالے گئے۔ جو وہاں رہنے پر مجبور ہیں۔

وفاقی دارالحکومت میں متاثرین کے ساتھ جو ظلم و ستم ہو رہا ہے ان کی داد رسی حکومتی ادارے کرنے کے لئے تیار نہیں۔ میڈیا کو اجازت نہیں کہ وہ متاثرین کا موقف بیان کر سکے۔ گزشتہ روز سی ڈی اے نے پولیس کے زور پر اچانک متاثرین کے گھروں کو بلڈوز کرنا شروع کیا اور انہیں زبردستی گھروں سے نکلنے پر مجبور کیا تو لوگوں نے پُرامن احتجاج شروع کردیا ۔ اس پر پولیس نے مظاہرین کے خلاف طاقت کا استعمال کرتے ہوئے انہیں زخمی کیا۔ اور بعد میں مظاہرین کے خلاف دہشتگردی سمیت مختلف دفعات کی ایف آئی آر کاٹی۔ تقریبآ 26 افراد کو گرفتار کیا گیا ۔ جنہیں آج دہشت گردی کی عدالت میں پیش کر کے پانچ روزہ ریمانڈ حاصل کیا گیا۔

مقامی وکلاء ٹیم گرفتار متاثرین کی ہر حوالے سے مدد کر رہی ہے۔ جن کی ضمانت کے تمام قانونی تقاضے پورے کرے گی۔ ایف آئی آر بے بنیاد الزامات پر مشتمل ہے۔ جس کا مقصد اہلیان نورپور شاہاں کو ہراساں کرنا اور ڈرانا ہے جو اپنے حقوق کے لیے جدو جہد کر رہے ہیں۔ اہلیان نورپور شاہاں حوصلے اور ثابت قدمی سے ریاستی جبر اور ظلم کا سامنا کر رہے ہیں۔ البتہ یہ لمحہ فکریہ ہے۔ کہ ریاست کی آئینی ذمہ داری ہوتی ہے کہ وہ اپنے عوام کو چھت فراہم کرے، لیکن اسلام آباد میں سرمایہ داروں کے مفادات کو پورا کرنے کے لئے عوام کو اس طرح گھروں سے نکالا جا رہا ہے جیسے اسرائیلی فورسز فلسطینوں کو غزہ سے نکالتے ہیں ۔

یہ بھی پڑھیں: ماں کے بغیر زندگی ادھوری ہے

لوگ سوال کرتے ہیں کہ ہمارا جرم کیا ہے؟ ایک مجرم کو بھی سزا سے پہلے جرم بتایا جاتا ہے؟ مگر ہمیں جرم بتائے بغیر ہمارے پورے خاندان کو سزا دی جا رہی ہے۔ ہمارے بچوں کا مستقبل در بدر کی ٹھوکریں، جہالت ، مناسب غذائیت سے محرومی، ریاستی تشدد سے پیدا ہونے والے نفسیاتی مسائل ہماری نسلوں کا پیچھا کرتے رہیں گے۔ کوئی ہمیں بتائے کہ اس ظلم و زیادتیوں کے بعد ہم اپنے بچوں کے سامنے ریاست کا دفاع کیسے کر سکیں گے؟ ہم کیسے ان سے وطن عزیز کے لئے محبت مانگ سکیں گے جن کے سامنے ان کا سائبان پولیس کے محاصرے میں ہیوی مشینری سے چند منٹوں میں زمین بوس کر دیا گیا۔ اور وہ سب کچھ بے بسی سے دیکھتے رہے۔ اور جنہوں نے اس ظلم کے خلاف آواز بلند کرنے کی کوشش کی ان پر دہشتگردی کا مقدمہ قائم کیا گیا۔

دین اسلام تو سلامتی کا ضامن ہے۔ اسلام کے نام پر بننے والے ملک کے وفاقی دارالحکومت اسلام آباد کے لئے اپنی زمینیں اور کاروبار دینے والوں کی نسل کی سلامتی کا کون ضامن ہے؟ آج سرمایہ کاری کے نام پر ان کو دن دھاڑے مہاجر بنایا جا رہا ہے۔ ان کی زمینوں پر ہوٹل اور کثیر المنزلہ عمارات کے منصوبے ہیں۔ ان سرمایہ کاروں کے لئے قانون میں لچک، سہولیات کی یقین دہانیاں ، ٹیکسوں کی چھوٹ اور ناز و نخرے برداشت ہوں گے۔ لیکن متاثرین سے کوئی رعایت نہیں۔