سعودی عرب نے یمن کے شہر الحدیدہ پر فضائی حملہ کر دیا

صنعاء (صدائے سچ نیوز) سعودی عرب نے یمن کے حوثیوں کے زیرِ کنٹرول اہم بندرگاہی شہر الحدیدہ پر فضائی حملے کیے ہیں۔ یہ دعویٰ حوثیوں کے زیرِ انتظام میڈیا نے کیا ہے جس کے مطابق جمعہ کی شب شہر میں متعدد مقامات کو نشانہ بنایا گیا۔

ذرائع کے مطابق حملوں میں ٹیلی کمیونیکیشن اتھارٹی کی تنصیبات اور کمران جزیرے کو بھی نشانہ بنایا گیا۔ حوثیوں کے ٹی وی چینل المسیرہ نے ان حملوں کو "سعودی جارحیت” قرار دیا۔

الجزیرہ کے مطابق بحیرۂ احمر میں ایک سعودی جہاز کو بھی نشانہ بنایا گیا، تاہم اس حوالے سے فوری طور پر سعودی حکام کی جانب سے کوئی باضابطہ بیان سامنے نہیں آیا۔

یاد رہے کہ حوثیوں نے حال ہی میں سعودی عرب کے خلاف سمندری ناکہ بندی کا اعلان کرتے ہوئے سعودی جہازوں کو نشانہ بنانے کی دھمکی دی تھی۔ حوثی قیادت نے 20 جولائی کو اس ناکہ بندی کا اعلان کرتے ہوئے اسے صنعاء کے بین الاقوامی ہوائی اڈے پر ایک ہفتہ قبل ہونے والے حملے کا "جوابی اقدام” قرار دیا تھا۔