آبنائے ہرمز پرمحصول وصولی بین الاقوامی قانون کے خلاف، اقوام متحدہ

نیویارک (صدائے سچ نیوز) اقوام متحدہ کے بین الاقوامی بحری ادارے (آئی ایم او) نے کہا ہے کہ آبنائے ہرمز سے گزرنے والے تجارتی بحری جہازوں پر کسی بھی قسم کا ٹول یا محصول عائد کرنا بین الاقوامی قانون کے خلاف ہے، جبکہ خلیج فارس میں جاری کشیدگی کے باعث پھنسے ہوئے ہزاروں ملاحوں کی سلامتی فوری توجہ کی متقاضی ہے۔

آئی ایم او کے سیکرٹری جنرل آرسینیو ڈومینیگیز نےکہا کہ 12 اور 13 جولائی کو دوبارہ لڑائی شروع ہونے کے بعد آبنائے ہرمز سے بحری جہازوں کی آمدورفت تقریباً معطل ہو چکی ہے۔ ان کے مطابق خلیج فارس میں اس وقت تقریباً 500 بحری جہاز کھڑے ہیں جن پر موجود تقریباً چھ ہزار ملاح شدید خطرات سے دوچار ہیں۔

ان کا مزید کہنا ہے کہ عالمی تجارت کا انحصار انہی ملاحوں پر ہے کیونکہ دنیا کا تقریباً 90 فیصد سامان سمندری راستوں سے منتقل کیا جاتا ہے۔ اگر جہاز رانی کا نظام متاثر ہوا تو اس کے اثرات پوری دنیا کی معیشت پر مرتب ہوں گے۔

ڈومینیگیز نے خبردار کیا کہ عالمی جہاز رانی گزشتہ چند برسوں سے مختلف بحرانوں کے باعث دباؤ میں ہے اور موجودہ صورتحال مزید پیچیدگی پیدا کر سکتی ہے۔ انہوں نے زور دیا کہ تنازع کے خاتمے تک بحری جہازوں کو آبنائے ہرمز سے گزرنے سے گریز کرنا چاہیے۔

آئی ایم او کے مطابق اس وقت اولین ترجیح جنگ کے باعث پھنسے ہوئے تمام ملاحوں کا محفوظ انخلا ہے۔ اس کے بعد سمندری راستوں سے بارودی سرنگوں کی صفائی، آبنائے ہرمز کی مکمل سکیورٹی اور مرحلہ وار بحری آمدورفت کی بحالی کو یقینی بنایا جائے گا تاکہ روزانہ تقریباً 135 جہازوں کی معمول کی نقل و حرکت دوبارہ شروع ہو سکے۔

سیکرٹری جنرل نے واضح کیا کہ بین الاقوامی قانون کے تحت کسی بھی ملک کو آبنائے ہرمز سے گزرنے والے تجارتی جہازوں سے ٹول یا اضافی فیس وصول کرنے کا اختیار حاصل نہیں۔ انہوں نے آبنائے ملاکا اور سنگاپور کے درمیان 2007 کے معاہدے کی مثال دیتے ہوئے کہا کہ وہاں بھی جہازوں سے کسی قسم کا اضافی محصول وصول نہیں کیا جاتا۔