آپریشن غضب للحق کے اثرات، خیبرپختونخوا میں دہشت گردی میں 65 فیصد کمی

پشاور (صداۓ سچ نیوز) خیبر پختون خوا میں آپریشن غضب للحق کے آغاز کے بعد صوبے میں دہشت گردی کے واقعات میں واضح کمی دیکھی گئی ہے۔ 

پولیس کے مطابق سال کے آغاز سے پہلے خیبر پختون خوا میں 240 دہشت گردی کے واقعات پیش آئے، لیکن آپریشن کے بعد سے صرف 80 واقعات رپورٹ ہوئے، جو 65 فیصد کمی کو ظاہر کرتے ہیں۔

صوبے میں رواں سال مجموعی طور پر 323 دہشت گردی کے واقعات ہوئے ہیں، جس کی دستاویزی تفصیلات موجود ہیں۔

وزیرِ مملکت برائے داخلہ طلال چوہدری کا کہنا ہے کہ افغانستان میں دہشت گردوں اور ان کی پناہ گاہوں کو نشانہ بنانے سے صوبے میں دہشت گردی میں کمی آئی ہے۔

 انہوں نے کہا کہ ملک سے ہر صورت دہشت گردی کا خاتمہ کیا جائے گا، آپریشن غضب للحق میں متعدد دہشت گردی کے ماسٹر مائنڈ مارے گئے ہیں، افغانستان کی عبوری حکومت نے دہشت گردوں اور ان کے ٹھکانوں کی نشاندہی میں تعاون کیا۔

چیف سیکریٹری خیبر پختون خوا شہاب علی شاہ نے کہا کہ آپریشن غضب للحق کے نتیجے میں صوبے میں امن و امان کی صورتِ حال پر مثبت اثرات مرتب ہوئے ہیں، وفاقی اور صوبائی ادارے دہشت گردی کے خاتمے کے لیے مل کر کام کر رہے ہیں اور حکومت اور تمام متعلقہ ادارے اس مقصد کے لیے ایک پیج پر ہیں۔