امریکا ایران مذاکرات، معاہدے کے حتمی نکات کا اعلان جلد متوقع

تہران (صداۓ سچ نیوز) ایران اور امریکا کے درمیان مذاکرات بحالی کی کوششوں میں بڑی پیش رفت ہوئی ہے۔

عرب میڈیا نے دعویٰ کیا ہے کہ امریکا ایران معاہدے کے ڈرافٹ کو حتمی شکل دینے کیلئے سنجیدہ کوششیں جاری ہیں۔ پاکستان سے اہم شخصیت کل ایران روانہ ہوسکتی ہے۔ جس کے بعد معاہدے کے حتمی نکات کا جلد اعلان متوقع ہے۔

دوسری جانب امریکی صدر ڈونلڈ ٹرمپ کا بھی بڑا بیان سامنے آیا ہے۔ صدر ٹرمپ نے کہا کہ ایران کے ساتھ مذاکرات آخری مراحل میں ہیں۔ دیکھتےہیں کیا ہوتا ہے۔ سوال یہ ہے کہ ہم معاملہ ختم کردیں یا ایران ڈیل پر دستخط کردے۔ ایران ڈیل کرے یا بہت بری چیزوں کے لئے تیار ہوجائے۔

دوسری جانب امریکا ایران مذاکرات کی بحالی کی کوششوں کے سلسلے میں وفاقی وزیر داخلہ محسن نقوی ایک بار پھر اہم پیغام لے کر ایران پہنچ گئے۔

وزیرداخلہ محسن نقوی کی ایرانی صدر ڈاکٹر مسعود پزشکیان سے اہم ملاقات ہوئی۔ محسن نقوی پاسداران انقلاب کے جنرل احمد وحیدی سے بھی ملے۔ خطے کی صورتحال اورایران امریکا مذاکرات کے حوالے سے گفتگو کی گئی۔

وفاقی وزیرداخلہ نے تہران میں ایرانی ہم منصب اسکندر مومنی سے بھی ملاقات کی۔ ایرانی میڈیا کے مطابق محسن نقوی کی ایرانی ہم منصب سے یہ دوسری ملاقات ہے۔ خطے کی صورتحال اور ایران امریکا مذاکرات کے حوالے سے گفتگو کی گئی۔