سٹی ڈویلپمنٹ پیکج، سرگودھا شہر میں 15 بڑی اور متعدد چھوٹی سڑکوں کی تعمیر و بحالی کی سمری تیار، پنجاب حکومت کو فنڈز کے لیے ارسال

سرگودھا (صداۓ سچ نیوز) کمشنر سرگودھا ڈویژن حافظ شوکت علی کی ذاتی دلچسپی اور خصوصی ہدایات کی روشنی میں محکمہ ہائی ویز نے سرگودھا شہر میں سٹی ڈویلپمنٹ پیکج کے تحت 15 بڑی جبکہ متعدد چھوٹی سڑکوں کی تعمیر و مرمت کی سمری تیار کر لی ہے، جسے منظوری کے لیے حکومت پنجاب کو بھجوانے کی اجازت دے دی گئی ہے۔ یہ منظوری کمشنر سرگودھا ڈویژن کی زیر صدارت منعقدہ ایک اجلاس میں دی گئی۔
اجلاس میں ایکسین ہائی ویز ملک گلفام اعوان نے بریفنگ دیتے ہوئے بتایا کہ شہر کی مختلف اہم شاہراہوں کو اس پیکج میں شامل کیا گیا ہے۔انہوں نے بتایا کہ ملت آباد پل سے 33 پھاٹک براستہ گل والا پھاٹک (7 کلومیٹر)، خیام چوک تا جیل روڈ براستہ شمع چوک، کلب روڈ (تقریباً 1.5 کلومیٹر)، کوئین چوک تا آزادی چوک تک (1.40) کلومیٹر)، میلہ منڈی چوک تا طارق آباد پھاٹک و ججز کالونی تک (2.10 کلومیٹر)، پل جانی مائنر تا 85 جھال تک (4.65 کلومیٹر)، شمع چوک تا اسٹیڈیم گیٹ (تقریباً 1 کلومیٹر)، ذیدی چوک تا پنجاب کالج براستہ ظفراللہ چوک (1.40کلومیٹر)، گل والا چوک تا رحمان پلازہ براستہ سیٹلائٹ ٹاؤن چوک (1.40 کلومیٹر)، سرکٹ ہاؤس تا کچہری چوک (1.70 کلومیٹر)، یونیورسٹی روڈ تا پی اے ایف بیریئر براستہ کوئن چوک (0.70 کلومیٹر) سمیت دیگر اہم سڑکیں شامل ہیں۔

یہ بھی پڑھیں: عالمی یوم ہیموفیلیا، کمشنر سرگودھا کا سندس فاؤنڈیشن کا دورہ، بچوں سے اظہارِ شفقت اور ڈونرز کو خراجِ تحسین

مزید برآں گول چوک روڈ، پریس روڈ، گرلز کالج روڈ، ڈیری روڈ، مشن سکول روڈ، واٹر سپلائی روڈ، محمدی کالونی روڈ، اسلام آباد کالونی روڈ ، عیدگاہ روڈ، چھوٹی سبزی منڈی روڈ، ریل بازار، اردو بازار، فاطمہ جناح روڈ اور دیگر علاقوں کی سڑکوں کی بحالی بھی اس پیکج میں شامل کی گئی ہے۔

اجلاس کو بتایا گیا کہ ان منصوبوں کے تخمینہ جات تیار کر کے حکومت پنجاب کو بھجوائے جا رہے ہیں اور سفارش کی گئی ہے کہ آئندہ مالی سال کے بجٹ میں ان سکیموں کے لیے فنڈز مختص کیے جائیں تاکہ شہریوں کو بہتر سفری سہولیات فراہم کی جا سکیں۔
کمشنر سرگودھا نے میونسپل کارپوریشن کے افسران کو ہدایت کی کہ وہ بھی دستیاب فنڈز کے تحت علیحدہ ترقیاتی پیکج تیار کریں۔ اس موقع پر سی او میونسپل کارپوریشن نے سالانہ ترقیاتی پروگرام پر بریفنگ دی۔

یہ بھی پڑھیں: افغانستان جنگ میں 18 سال لگے، ایران جنگ 2 ماہ میں ختم ہورہی ہے، ڈونلڈ ٹرمپ

ایم ڈی واسا نے پنجاب ڈویلپمنٹ پروگرام کے تحت جاری میگا پراجیکٹ پر تفصیلی بریفنگ دی۔ کمشنر نے ایم ڈی واسا کو ہدایت کی کہ جاری منصوبے پر کام کی رفتار مزید تیز کی جائے اور جہاں سیوریج لائنیں بچھائی جا چکی ہیں وہاں سڑکوں اور گلیوں کی فوری بحالی یقینی بنائی جائے۔

کمشنر نے ایم ڈی واسا سے مکمل ایکشن پلان طلب کرتے ہوئے ہدایت کی کہ تمام متاثرہ سڑکوں اور گلیوں کو جلد از جلد بہتر حالت میں بحال کیا جائے۔

اجلاس میں ڈائریکٹر ڈویلپمنٹ، ایم ڈی واسا، سی او میونسپل کارپوریشن، ایکسین ہائی ویز اور دیگر متعلقہ افسران نے شرکت کی۔