گوشت کی ایکسپورٹ اور شادی بیاہ کے کھانوں پر فوری پابندی عائد کی جائے، خورشید احمد قریشی

اسلام آباد (صداۓ سچ نیوز) صدر آل پاکستان جمعیت القریش میٹ ویلفیئر ایسوسی ایشن اور ممبر لائیو اسٹاک اینڈ ڈیری ڈویلپمنٹ بورڈ، خورشید احمد قریشی نے حکومت سے اپیل کی ہے کہ گوشت کی ایکسپورٹ اور شادی بیاہ سمیت دیگر تقریبات میں گوشت کے بے دریغ استعمال پر فوری طور پر مکمل پابندی عائد کی جائے، بصورت دیگر آنے والی عیدالاضحیٰ کے موقع پر ملک کو جانوروں کی شدید قلت اور مہنگائی کے طوفان کا سامنا کرنا پڑے گا۔
اپنے بیان میں انہوں نے کہا کہ ملک میں مویشیوں کی تعداد میں خطرناک حد تک کمی واقع ہو رہی ہے، جس کے باعث طلب اور رسد میں واضح فرق پیدا ہو چکا ہے۔ ان کا کہنا تھا کہ اگر فوری طور پر ایکسپورٹ پر کنٹرول اور تقریبات میں گوشت کے استعمال کو محدود نہ کیا گیا تو صورتحال مزید سنگین ہو جائے گی۔
انہوں نے خبردار کیا کہ اگر فی الفور اقدامات نہ کیے گئے تو آنے والی عیدالاضحیٰ پر قربانی کے جانوروں کی شدید قلت پیدا ہو جائے گی، جس کے نتیجے میں قیمتوں میں غیر معمولی اضافہ ہوگا اور مہنگائی کا ایک نیا طوفان برپا ہو جائے گا۔
خورشید احمد قریشی نے مہنگائی کی موجودہ صورتحال کو پٹرول کی قیمتوں سے تشبیہ دیتے ہوئے کہا کہ
جس طرح پٹرول کی قیمتیں آسمان کو چھو رہی ہیں، اسی طرح گوشت کی قیمتیں بھی عام آدمی کی پہنچ سے دور ہوتی جا رہی ہیں۔
انہوں نے مزید کہا کہ
“اگر گوشت کی ایکسپورٹ پر فوری پابندی نہ لگائی گئی تو عیدالاضحیٰ تک گوشت اور مویشیوں کی قیمتیں بھی پٹرول کی طرح بے قابو ہو جائیں گی اور عوام کے لیے قربانی کرنا انتہائی مشکل ہو جائے گا۔”
انہوں نے کہا کہ اس وقت بکرے کے گوشت (مٹن) کی قیمتیں پہلے ہی عام آدمی کی قوت خرید سے باہر ہوتی جا رہی ہیں اور عید کے قریب آتے ہی اس میں مزید اضافہ متوقع ہے، جس سے قربانی کے جانور خریدنا عوام کے لیے ایک بڑا چیلنج بن جائے گا۔
انہوں نے حکومت سے مطالبہ کیا کہ ہنگامی بنیادوں پر جامع پالیسی مرتب کی جائے، جس کے تحت گوشت کی ایکسپورٹ کو فوری طور پر روکا جائے اور شادی بیاہ و دیگر تقریبات میں گوشت کے استعمال کو ضابطے میں لایا جائے۔
انہوں نے یہ بھی تجویز دی کہ صورتحال کو کنٹرول کرنے کے لیے ایتھوپیا، صومالیہ اور دیگر ممالک سے مویشیوں کی درآمد پر بھی فوری غور کیا جائے تاکہ طلب اور رسد میں توازن قائم رکھا جا سکے۔
آخر میں انہوں نے امید ظاہر کی کہ حکومت اس سنگین مسئلے کا فوری نوٹس لے گی اور ایسے عملی و دیرپا اقدامات کرے گی جن سے نہ صرف مویشیوں کی قلت پر قابو پایا جا سکے بلکہ عیدالاضحیٰ کے موقع پر عوام کو ریلیف بھی فراہم ہو۔