اسلام آباد میں ڈرائیونگ لائسنس سے متعلق سہولتیں آن لائن فراہم کرنے کا فیصلہ

اسلام آباد (صداۓ سچ نیوز) اسلام آباد ٹریفک پولیس نے شہریوں کی سہولت کے لیے لرنر پرمٹ، ڈرائیونگ لائسنس کی تجدید اور ڈپلیکیٹ لائسنس کے اجرا کی سہولت آن لائن فراہم کرنے کا اعلان کردیا۔

چیف ٹریفک آفیسر کائنات اظہر کے مطابق آن لائن سہولتیں اسلام آباد ٹریفک پولیس کے ویب پورٹل پر دستیاب ہوں گی۔

سی ٹی او کے مطابق 19 اکتوبر سے ٹریفک ہیڈ کوارٹرز اور پولیس خدمت مراکز پر یہ سہولتیں دستیاب نہیں ہوں گی۔

کائنات اظہر نے بتایا کہ تجدید شدہ اور ڈپلیکیٹ ڈرائیونگ لائسنس شہریوں کو کوریئر کے ذریعے ان کے گھروں پر پہنچائے جائیں گے۔

انہوں نے شہریوں کو ہدایت کی کہ آن لائن درخواست دیتے وقت اپنا مکمل نام، درست رہائشی پتہ اور فعال موبائل نمبر درج کریں، کیونکہ غلط یا نامکمل پتہ درج کرنے کی صورت میں ڈرائیونگ لائسنس کی ترسیل میں تاخیر ہوسکتی ہے۔