آئی ایم سی جی ایف سکس ٹو کی بارہویں جماعت کی طالبہ کی شاندار کامیابی، فیڈرل بورڈ میں دوسری پوزیشن

اسلام آباد (صدائے سچ نیوز) اسلام آباد ماڈل کالج برائے طالبات ایف سکس ٹو کی ہیومینٹیز گروپ کی طالبہ آمنہ اظہر نے فیڈرل بورڈ آف انٹرمیڈیٹ اینڈ سیکنڈری ایجوکیشن کے بارہویں کلاس کے نتائج میں دوسری پوزیشن حاصل کی ہے۔

آمنہ اظہر نے اپنی اس کامیابی کواپنے اساتذہ کی محنت ، رہنمائی اور والدین کی دعائوں کا نتیجہ قرار دیا ہے۔اس موقع پرآئی ایم سی جی ایف سکس ٹو کی پرنسپل عالیہ درانی اور اساتذہ نے مذکورہ طالبہ کو مبارکباد دی۔

مجموعی طور پر مذکورہ کالج کا نتیجہ 98.98فیصد رہا ہے جو کہ بہت بڑی کامیابی ہے۔ ایف سی ای پری میڈیکل ،پری انجینئرنگ، جنرل گروپ، آرٹس (ایوننگ) میں سو فیصد جبکہ آئی کام اورآ رٹس (مارننگ)میں نتیجہ 98فیصد اور96فیصد رہا۔ مجموعی طورپر 295طالبات نے امتحانات میں حصہ لیا جن میں 292 کامیاب اور 3ناکام ہوئیں ۔

مزید برآں بارہویں جماعت آئی سی ایس میں بھی نتیجہ 100فیصد رہاجبکہ جویریہ عمران نے 1100میں سے 975نمبر حاصل کر کے پہلی پوزیشن، سیدہ دانیہ بتول نے 956نمبر حاصل کر کے دوسری پوزیشن اور عروج فاطمہ نے 905نمبر لیکر تیسری پوزیشن حاصل کی ہے۔

والدین نے اس شاندار کامیابی پرپرنسپل عالیہ درانی ، پری میڈیکل اور پری انجینئرنگ کی کلاس ٹیچر نائلہ راشد، جنرل گروپ کی ثناء مبشر اور آسیہ تبسم ، آرٹس گروپ کی ماہ جبین خالد اور ہدیٰ عقیل خان اور آئی کام کی کلاس ٹیچر ثمانہ اخترکو مبارکباد دیتے ہوئے کہا ہے کہ اس کامیابی کا سہرا پرنسپل اور اساتذہ کے سر ہے۔