ملک میں پائیدار امن واستحکام کے قیام تک دہشتگردی کیخلاف جنگ قومی عزم کیساتھ جاری رہےگی، فیلڈ مارشل

اسلام آباد (صداے سچ نیوز) چیف آف ڈیفنس فورسز فیلڈ مارشل عاصم منیر نے واضح کردیا کہ ملک میں پائیدار امن و استحکام کے قیام تک دہشتگردی کے خلاف جنگ قومی عزم کےساتھ جاری رہے گی۔

پاک فوج کے افسران و جوانوں کو عسکری اعزازات دینے کےلیے جی ایچ کیو میں تقریب ہوئی،  تقریب کے مہمان خصوصی فیلد مارشل عاصم منیر تھے۔

 فیلڈ مارشل  نے شہداء کے اہلِخانہ کی ثابت قدمی، وقار  اور حوصلے کو خراجِ تحسین پیش کرتے ہوئے شہداء کی بے مثال قربانیوں اور وطن سے لازوال وابستگی کو سراہا۔

آئی ایس پی آر کے مطابق فیلڈ مارشل نے شہداء کے اہلِ خانہ، افسران اور جوانوں کو اعزازات سے نوازا ، آپریشنز میں غیر معمولی بہادری اور وطن کیلئے نمایاں خدمات کے اعتراف میں مختلف اعزازات بشمول 50 ستارہ امتیاز اور12 تمغہ بسالت عطا کیے گئے۔

فیلڈ مارشل عاصم منیر نے کہا کہ  شہدا اور غازی قوم کا لازوال فخر ہیں ، شہدا کی عزت اور قربانی ہر پاکستانی کے لیے مقدس امانت ہے ، مادر وطن کا امن و امان شہدا کی عظیم قربانیوں اور غیر متزلزل عزم کا مرہون منت ہے۔

فیلڈمارشل نے پاک فوج اورقانون نافذ کرنےوالےاداروں کی آپریشنل تیاری اورغیر متزلزل عزم کو بھی سراہا۔