امریکا نے ایران سے متعلق نئی پابندیوں کا اعلان کردیا

واشنگٹن (صدائے سچ نیوز) امریکا نے ایران سے مائع پیٹرولیم گیس (ایل پی جی) کی برآمدات اور مبینہ ’شیڈو بینکنگ‘ نیٹ ورکس پر نئی پابندیاں عائد کر دی ہیں۔

امریکی محکمہ خزانہ کے بیان کے مطابق اس نیٹ ورک نے متحدہ عرب امارات اور چین میں قائم فرنٹ کمپنیوں اور جہازوں کے ایک شیڈو فلیٹ کا استعمال کیا اور ایرانی ایل پی جی کو عمان کی ایل پی جی قرار دے کر فروخت کیا۔

بیان میں کہا گیا کہ یہ نظام موجودہ امریکی پابندیوں سے بچنے کے لیے تیار کیا گیا تھا اور اس کے ذریعے کروڑوں ڈالر مالیت کی ایل پی جی کی ترسیل کی گئی۔

یہ بھی پڑھیں: صرف امریکا اور چین ایران میں ملبے تلے دبا افزودہ یورینیم نکال سکتے ہیں: ٹرمپ

اس کے علاوہ امریکا  نے جمعے کو ایک ایرانی کرنسی ایکسچینج ہاؤس اور اس سے وابستہ افراد پر بھی پابندیاں عائد کیں جن پر ایران کے لیے اربوں ڈالر کی مالی لین دین میں سہولت فراہم کرنے کا الزام ہے۔

غیرملکی خبررساں ایجنسی کے مطابق پابندیوں میں متعدد افراد، 12 کمپنیاں اور 6 ایل پی جی ٹینکرز شامل ہیں۔

پابندیوں میں شامل کمپنیاں مارشل جزائر، متحدہ عرب امارات اور چین میں موجود ہیں جبکہ  ایل پی جی ٹینکروں میں 4 پاناما کے پرچم بردار ٹینکر شامل ہیں۔