صوبے کی تقسیم کے خلاف سندھ اسمبلی میں قرارداد منظور

کراچی (صداۓ سچ نیوز) سندھ کی تقسیم کے خلاف سندھ اسمبلی میں قرار داد منظور کرلی گئی، قرارداد پیپلز پارٹی کے رکن اسمبلی نثار کھوڑو نے پیش کی تھی۔

اس موقع پر وزیر اعلیٰ سندھ مراد علی شاہ نے کہا کہ اپوزیشن اراکین سے کہا کہ مل کر ایک مشترکہ قرارداد منظور کرلیں، نثار کھوڑو نے قرارداد کا مسودہ قواعد کو مدنظر رکھتے ہوئے تیار کیا۔

انہوں نے کہا کہ اپوزیشن نے انتظامی یونٹس کے قیام کی بات شامل کرنے کی تجویز دی، انتظامی یونٹس کے قیام کو سندھ کی تقسیم کے بنیادی معاملے کے ساتھ جوڑنا مناسب نہیں، انتظامی یونٹس کے قیام پر الگ بحث کرنی تھی تو علیحدہ قرارداد لائی جاسکتی تھی۔

مراد علی شاہ نے کہا کہ ہم نے مقامی حکومتوں کو مضبوط بنانے کی تجویز کی بھی حمایت کی، مقامی حکومتوں کو مضبوط بنانے کے لیے مزید اقدامات پر ہم تیار ہیں۔

وزیراعلیٰ سندھ نے کہا کہ اپوزیشن سے کہا انتظامی یونٹس یا مقامی حکومتوں پر الگ قرارداد لے آئیں، اپوزیشن اراکین نے مشترکہ قرارداد پر اتفاق کے بجائے ایوان سے واک آؤٹ کیا، اپوزیشن نے مشترکہ قرارداد کی حمایت نہ کرکے اپنی بدنیتی ظاہر کردی۔

صوبائی وزیر شرجیل میمن نے کہا کہ یہ احتجاج اور واک آؤٹ کا بہانہ بنا کر اسمبلی سے بھاگ رہے ہیں، پی ٹی آئی نے بھی آج بائیکاٹ کیا ہے، پیپلز پارٹی ایوان میں موجود رہی باقی سب بائیکاٹ کر گئے۔

سندھ اسمبلی کا اجلاس کل دن ڈھائی بجے تک ملتوی کردیا گیا۔