خیبرپختونخوا پولیس کی تنخواہوں میں اضافہ اور دیگر ضروریات سے متعلق سمری گورنر کو ارسال

پشاور (صداۓ سچ نیوز) خیبرپختونخوا پولیس کی تنخواہوں میں اضافہ اور دیگر ضروریات سے متعلق سمری گورنر کو ارسال کردی گئی۔

سمری میں کہا گیا ہے کہ جنوبی اور ضم شدہ اضلاع کے لیے 120 فیصد سیکیورٹی چیلنج الاؤنس دیا جائے۔

سمری کے مطابق دیگر آباد اضلاع میں بنیادی تنخواہ کا 100 فیصد سیکیورٹی چیلنج الاؤنس جبکہ ہزارہ ریجن کے پولیس اہلکاروں کو بنیادی تنخواہ کا 75 فیصد سیکیورٹی چیلنج الاؤنس دیا جائے۔

سمری میں کہا گیا ہے کہ خیبرپختونخوا پولیس گزشتہ 3 دہائیوں سے دہشت گردی کے خلاف برسرِ پیکار ہے، پولیس کی قربانیوں کے باوجود تنخواہیں دیگر صوبوں کے مقابلےمیں کم ہیں۔

سمری میں یہ بھی کہا گیا ہے کہ کے پی پولیس کے ساز و سامان اور آلات کو جدید خطوط پر استوار کرنے کی ضرورت ہے۔