قائداعظم نے تاریخ کا رخ بدل دیا، قومی مسائل کے حل کیلئے سنجیدہ کوششیں ضروری ہیں، عبیداللہ چوہدری

اسلام آباد (صداۓ سچ نیوز) مرکزی صدر نیشنل ایسوسی ایشن آف پرائیویٹ سکولز، چیئرمین کیرئیر سکول اینڈ کالج محمد عبیداللہ چوہدری نے کہا ہے کہ قوم بانی پاکستان کا 78 واں یوم وصال اس تجدید عہد سے منائی گی کہ وہ پاکستان کو قائداعظم محمد علی جناح کے خوابوں کی تعبیر دلا کر دم لے گی۔

ان کا کہنا تھا کہ بابائے قوم پاکستان کو اقوام عالم میں ممتاز، منفرد اور خوشحال دیکھنا چاہتے تھے۔ ضروری ہے کہ وفاقی وصوبائی حکومتیں تعلیم’ صحت اور روزگارسمیت درپیش مسائل سے نجات کے لیے اجتماعی کوششیں کریں۔

قائداعظم کی برسی کے حوالے سے گفتگو میں انہوں نے بتایا کہ وطن عزیز میں آج بھی پونے 3 کروڑ نونہال سکول ایجوکیشن سے باہر ہیں۔ 5 کروڑ نوجوان فراہمی روزگار کے منتظر ہیں، رہی سہی کسر بڑھتی ہوئی مہنگائی نے پوری کر دی۔

عبیداللہ چوہدری نے استفسار کیا کہ کیا ان مسائل ومشکلات کی موجودگی میں پاکستان فلاح مملکت بن سکتا ہے؟ آج بھی ہم ملکی اتحاد و تعاون اور صحیح اسلامی جوش و خروش سے کام کریں تو اللہ کے فضل و کرم سے پاکستان جلد ہی عظیم ترین ممالک میں شمار ہونے لگے گا۔

وطن کی تعمیرواستحکام کیلئے تحریک پاکستان جیسے عزم و اتحاد کی ضرورت ہے، یہی وجہ ہے کہ قرارداد لاہور نے برصغیر کی تاریخ کا رُخ بدل دیا، بلاشبہ اتحاد اور تنظیم کی بدولت مسلمانوں نے دو طاقتور دشمنوں ہندو اور فرنگیوں کو شکست دے دی۔

پاکستان کا قیام کسی ایک فرد یا کسی ایک طبقہ کی کوششوں کا نتیجہ نہیں ہے بلکہ پوری قوم نے قائد اعظم کے ساتھ مل کر اُن کی آواز پر لبیک کہتے ہوئے اپنے تن، من، دھن کی قربانی دی جس کے نتیجے میں آزادی کا سورج دیکھنا نصیب ہوا