تعلیم سے محروم رہ جانے والے بچوں کی معاونت سب کی ذمہ داری، امتیاز رضوی، اعجاز گیلانی

اسلام آباد (صدائے سچ نیوز) تعلیم سے محروم بچوں کو مفت اور معیاری تعلیم کی فراہمی کے اپنے مشن کو جاری رکھتے ہوئے جونیئر جناح ٹرسٹ نے ایجوکیشنل لیڈرشپ مینجمنٹ سسٹم کے تعاون سے محلہ سیداں، کیانی روڈ، بہارہ کہو، اسلام آباد میں ایک نئے تعلیمی کیمپس کا باقاعدہ افتتاح کر دیا۔۔

افتتاحی تقریب میں معزز سماجی شخصیات، ماہرینِ تعلیم، فلاحی شعبے کے نمائندگان اور مقامی کمیونٹی کے افراد نے شرکت کی۔ تقریب کا آغاز تلاوتِ کلامِ پاک سے ہوا جس کے بعد ربن کاٹ کر نئے کیمپس کا افتتاح کیا گیا۔ اس موقع پر فروغِ تعلیم، پاکستان کی ترقی و خوشحالی اور اس تعلیمی منصوبے کی کامیابی کے لیے خصوصی دعا بھی کی گئی۔

تقریب میں نمایاں شخصیات جن میں ایئر کموڈور (ر) سید رمیز گیلانی سید اعجاز عباس گیلانی سابق چیئرمین یونین کونسل نمبر 4سید امتیاز علی رضوی، چیف ایگزیکٹو آفیسر، ایجوکیشنل لیڈرشپ مینجمنٹ سسٹم (ELMS)محمد اعظم خان، زونل صدر PSNمحمد الخیام نذیر، ڈائریکٹر کارپوریٹ ڈویلپمنٹ، جونیئر جناح ٹرسٹ صادق سڈل اورسابق زونل صدر PASMAشہزاد سلیم عباسی، منیجر فنڈ ریزنگ نے شرکت کی جبکہ سٹیج سیکرٹری کے فرائض رفیق احمد توحیدی نے انجام دئیے اور قاری ارشد اعوان نے تلاوت کلام پاک فرمائی

مقررین نے اپنے خطابات میں معاشرتی ترقی میں تعلیم کے بنیادی کردار کو اجاگر کیا اور اس بات پر زور دیا کہ معاشرے کے تمام طبقات کی مشترکہ ذمہ داری ہے کہ وہ معاشی اور سماجی مسائل کے باعث تعلیم سے محروم رہ جانے والے بچوں کی معاونت کریں۔ مہمانوں نے جونیئر جناح ٹرسٹ اور ELMS کی جانب سے تعلیمی مواقع کی فراہمی اور ان کے دائرہ کار کو وسعت دینے کی کاوشوں کو سراہا اور اس امید کا اظہار کیا کہ یہ نیا کیمپس علاقے کے بچوں کی تعلیمی ترقی میں اہم کردار ادا کرے گا۔

جونیئر جناح ٹرسٹ کے نمائندگان نے بتایا کہ ادارہ ملک بھر میں اپنے مختلف تعلیمی پروگرامز کے ذریعے ہزاروں مستحق اور تعلیم سے محروم بچوں کو تعلیم کے مواقع فراہم کر رہا ہے۔ انہوں نے کہا کہ بہارہ کہو کیمپس کا قیام ادارے کے اس عزم کی ایک اور اہم کڑی ہے جس کے تحت ہر بچے کو مالی حالات سے قطع نظر معیاری تعلیم تک رسائی فراہم کرنا مقصود ہے۔

تقریب کے اختتام پر مہمانوں نے کیمپس کا دورہ کیا، سہولیات کا جائزہ لیا اور انتظامات کو سراہتے ہوئے اپنی نیک تمنائوں کا اظہار کیا۔ جونیئر جناح ٹرسٹ اور ELMS نے اس عزم کا اعادہ کیا کہ وہ مستقبل میں بھی مل کر پسماندہ اور مستحق بچوں کو تعلیمی مواقع فراہم کرنے اور معاشرے میں علم و آگہی کے فروغ کے لیے اپنا کردار ادا کرتے رہیں گے۔